Luftëtari vijon me testimet, ja lojtarët që po rezistojnë
Luftëtari është futur në javën e dytë të përgatitjeve verore në kuadër të sezonit 2016-2017. Drejtuesit gjirokastritë përditë e më shumë janë duke punuar për formatimin e një skuadre kompetitive. Megjithatë, ashtu siç klubi ka paralajmëruar, kjo periudhë do të shërbejë për të testuar disa lojtarë, pasi për afrimet cilësorë do të pritet tregu i huaj. Drejtuesit kanë premtuar afrimin e pesë lojtarëve që bëjnë diferencën në kampionatin shqiptar. Aktualisht vetëm 11 futbollistë janë të sigurt në skuadër, pasi kanë firmosur për sezonin e ri. Ndërkohë, afrimi më i fundit që pritet t'i nënshtrohet një testimi është portieri elbasanas Shkëlzen Ruçi, i cili mbylli sezonin me Bylisin në Kategorinë Superiore. 24-vjeçari i është bashkuar dje grupit të portierëve nën urdhrat e përgatitësit Ilirian Zeko. Nga klubi nuk ka asnjë konfirmim nëse Ruçi mund të firmosë, por gjithsesi çdo gjë do të shikohet në ditët në vijim. Ndërkohë, nga Elbasani ka ardhur për t'u testuar sulmuesi Kristal Abazaj. 20-vjeçari po stërvitet me bluzinjtë, por nuk mund të thuhet se do të qëndrojë. Gjithashtu, nga të rinjtë e Vllaznisë ka ardhur Silvio Zogaj, i cili ka disa ditë që po stërvitet me Luftëtarin dhe ka spikatur mbi të tjerët. Bëhet fjalë për një lojtar të talentuar lezhjan, që ka luajtur rregullisht me ekipin U-19 kuqeblu. Deri në fundjavë trajneri Milinkoviç do të vendosë për lojtarët në provë, pasi më pas skuadra do të niset për fazë përgatitore dhe grupi do të përbëhet vetëm nga 25 futbollistë. Dje skuadra kreu stërvitje në fushën e stadiumit "Gjirokastra", duke e shfrytëzuar atë për faktin se do të zëvendësohet, për të qenë gati në muajin shtator, kur nis kampionati.