Lojtari më i mirë i Europës, UEFA publikon 10 finalistët
Mungon Nejmar, Bufon "italiani" i vetëm
UEFA ka publikuar listën me lojtarët që do të votohen për të fituar çmimin si futbollisti më i mirë i Europës. Ditën e djeshme janë zyrtarizuar dhjetë finalistët, të cilët do të rivalizojnë me njëri-tjetrin për t'u ulur në fronin më të lartë të Europës. Emrat - Emrat e zyrtarizuar janë ata që gjatë këtij sezoni kanë lënë gjurmë dhe kanë fituar trofe të rëndësishëm dhe surpriza e vetme është mungesa e brazilianit Nejmar. Ai nuk është prezent në dhjetëshen finaliste, pavarësisht se bëri një sezon të mirë duke shënuar gola që e ndihmuan Barcelonën të fitonte titullin kampion. Megjithatë, të tjerët që gjenden në listë kanë fituar më shumë pikë dhe vëmendje edhe për faktin se u aktivizuan në Europian dhe Nejmar gjatë kësaj kohe ka qenë pushim. Bie në sy prezenca e veteranit italian Xhanluixhi Bufon, i cili është i vetmi që mban lart flamurin e "axurrëve". Ai vjen në këtë listë pas një sezoni të shkëlqyer me Juventusin, ku arriti të thyente rekordin e "pathyeshmërisë" duke mbajtur të paprekur portën për më shumë se 1000 minuta. Bufon luajti gjithashtu edhe një Europian prej protagonisti me Italinë, por nuk arriti të shkonte më shumë sesa çerekfinalet pasi iu desh të përplasej me Gjermaninë. Ronaldo duket se është favoriti kryesor për ta fituar edhe këtë trofe. Pas triumfit në Ligën e Kampionëve dhe në Europian, portugezi ka avantazh më shumë se të tjerët dhe nga fitorja e një çmimi të tillë do të kuptohet nëse ai mund të triumfojë edhe si lojtari më i mirë
në botë. Votimet - Specialistët dhe gazetarët do të votojnë për 10 finalistët deri në datën 5 gusht dhe nga votat e tyre do të
përzgjidhet lojtari më i mirë i Europës për sezonin që lamë pas. Fituesi do të publikohet në ditën kur të hidhet shorti i fazës së grupeve të Ligës së Kampionëve.