Akuzohet Rusia, dopingu prej shërbimeve sekrete

Ka dyshime për mashtrime me 312 analiza të sportistëve

Thellohet skandali i dopingut në Rusi. Laboratori i Antidopingut në Moskë dhe Soçi është nën akuzë pasi ka manipuluar një numër të madhe të testeve pozitive të sportistëve rusë gjatë Lojërave Olimpike Dimërore që u zhvilluan në Soçi në vitin 2014. Akuza vjen nga Agjencia Botërore e Antidopingut (WADA), në raportin e një komisioni të pavarur. Ky raport është përgatitur nga profesori kanadez i ligjit sportiv Riçard MekLaren dhe u bë publik prej tij në një konferencë për shtyp në Toronto. MekLaren, ishanëtar i Komisionit të Pavarur të WADA-s ka zbuluar praktikën e dopingut dhe korrupsionit të atletëve rusë nën mbikëqyrjen e Ministrisë Ruse të Sportit, madje edhe të Shërbimeve Sekrete (FSB, ish-KGBja e famshme). Në raportin e WADA-s ka pretendime për një manipulim nga autoritetet e Moskës dhe Soçit për të paktën 312 raste. Dhe dopingu ka qenë sistematik duke filluar nga Lojërat e Vankuverit në vitin 2010 dhe duke u shtrirë në mjaft sporte. Nën hetim janë Olimpiada e Londrës në 2012-ën, kampionati botëror i atletikës në Moskë në vitin 2013 dhe me ai i notit në Kazan në 2015-ën. MekLaren argumenton se denoncimi mbështetet në prova të mjaftueshme dhe se për çdo gjë është informuar vazhdimisht në rastin e Lojërave të Soçit zëvendësministri i Sporteve, Juri Nagorniki. "Ministri i Sportit nuk mund të mos ishte në dijeni duke pasur parasysh madhësinë e fenomenit", është

pretendimi i MekLaren. Denoncimi i MekLaren vjen vetëm 24 orë pas kërkesës së 10 laboratorëve antidoping në disa shtete (ku vlen të përmenden dy superfuqitë sportive, Amerika dhe Gjermania) dhe disa sportistëve për përjashtimin e përfaqësueses olimpike ruse nga Lojërat e gushtit në Rio de Zhaneiro.