Vjen një sulmues nga Liga e Dytë serbe
Klubi: Lojtari është produkt i shkollës së Bajernit të Mynihut
Tirana ka konfirmuar një përforcim për se zonin e ardhshëm dhe bëhet fjalë për një sulmues 21-vjeçar nga Nigeria. Në një komunikatë, bardheblutë kanë konfirmuar që është arritur marrëveshja me Emeka Emerun. "Sulmuesi nigerian Emeka Emerun ka mbërritur sot (dje) në mesditë në resortin ku skuadra është grumbulluar në Zlatibor. Ai do të jetë pjesë e Tiranës, pasi më parë është gjetur akordi për të nënshkruar një kontratë. Emerun do të kryejë nesër (sot) testet mjekësore dhe më pas do t'i bashkohet skuadrës në stërvitje për të zyrtarizuar më pas marrëveshjen që e bën zyrtarisht bardheblu. Sulmuesi 21vjeçar ka bindur stafin teknik që ka ndjekur disa nga ndeshjet e fundit që ai ka zhvilluar në Serbi me skuadrën e Sloboda Uzices. Emerun është produkt i shkollës së Bajern Mynih, ndërkohë që para se te transferohej te Sloboda ka luajtur në Tunizi për dy sezone. Sulmuesi është prezantuar sot ( dje) me skuadrën dhe tani është akomoduar në kampingun bardheblu në Zlatibor", thuhej në njoftimin e djeshëm të klubit. Ai ka luajtur vetëm 13 nga 29
ndeshje në total si titullar gjatë sezonit të kaluar, edhe pse ka qenë pjesë e një klubi si Sloboda Uzice që militon në kategorinë e dytë të Serbisë. Madje, ata nuk arritën as të sigurojnë mbijetesën, duke u rrëzuar në kategorinë e tretë. Nigeriani ka gjetur
rrugën e rrjetës katër herë përgjatë 1078 minutave të aktivizimit gjithë sezonit. Në të shkuarën, ka qenë pjesë e dy klubeve tuniziane, ndërsa për afro 4 muaj ka qenë pjesë e organikës së Bajern Mynih U- 19. Tirana ka qenë mjaft aktive gjatë merkatos së verës,
duke konfirmuar deri tani afrime si Ilion Lika, Marvin Turtulli, Afrim Taku, Asion Daja dhe Ansi Nika. Ndërkohë, janë larguar disa prej titullarëve të edicionit të kaluar, si Elis Bakaj, Masato Fukui, Dejan Karan apo Argjend Malaj.