Valdrin Rashica del në stërvitje me Teutën, dilema për Rizvanin

Nën urdhrat e trajnerit Ahmataj, Teuta është grumbulluar ditën e djeshme për të rinisur punën për përgatitjet në lidhje me edicionin e ri. Trajneri elbasanas dhe ndihmësit e tij Jakupi e Kapllani kanë zhvilluar seancën e parë stërvitore pas ndeshjeve të Europa Ligës. Skuadra e paraqitur në ndeshjet e vlefshme për eliminatoret në turneun europian ka disa ndryshime, ku me grupin nuk janë parë Moçka dhe Lena. Dy ish-lojtarët e Flamurtarit nuk kanë përfunduar bisedimet me drejtuesit dhe nuk dihet ende nëse do të jenë apo jo pjesë e durrsakëve për sezonin e ardhshëm. Në bisedime është dhe kapiteni Rizvani, e ardhmja e të cilit është në pikëpyetje tek ekipi i Teutës. Kapiteni nuk ka zhvilluar stërvitje me ekipin në seancën e djeshme, por pret mbylljen e bisedimeve me drejtuesit e klubit, të cilët janë treguar të hapur me të gjithë lojtarët për të biseduar rreth kontratave që kanë me klubin apo dhe për rinovimin e kontratave me ata lojtarë që e kanë përfunduar bashkëpunimin me "Djemtë e Detit". Më e thjeshtë duket situata për Hodon, Hysenin, Kotobellin dhe Erand Hoxhën, të cilët pritet të rinovojnë nga dita në ditë, duke mos e pasur problem hedhjen e firmës në kontratë për vazhdimësinë e tyre me skuadrën durrsake. Në stërvitje është parë dhe ish-mesfushori i Skënderbeut, Valdrin Rashica, i cili është bashkuar me durrsakët. Sipas informacioneve që "Panorama Sport" disponon, kosovari është në provë tek ekipi durrsak dhe pritet që në ditët në vazhdim të mbyllë edhe bisedimet me drejtuesit e Teutës. Ndryshime ka, lëvizjet sapo kanë filluar, por mësohet se nuk do të jenë vetëm këto përforcimet e Teutës në këtë merkato, pasi priten lojtarë të tjerë.