Merkato e bluzinjve, Gava në listën e dëshirave
Teksa Luftëtari është duke vijuar përgatitjet në tokën helene, në Nausa të Verias, drejtuesit gjirokastritë po punojnë vazhdimisht për të formatuar skuadrën ideale me të cilën do të ballafaqohen mes më të mirave të futbollit shqiptar. Burime të besueshme për "Panorama Sport" bëjnë me dije se drejtuesit e Luftëtarit kanë projektuar prej kohësh elbasanasin Orgest Gava. Lojtari, i cili ka qenë pjesë e Bylisit sezonin e fundit, shihet si përforcimi i radhës për "mushkërinë" e mesfushës gjirokastrite. Orgest Gava karrierën sportive e ka nisur te skuadra e vendlindjes, Elbasani, në vitin 2008. Në vijimësi ka mbajtur veshur fanellën e Shkumbinit deri në sezonin 20122013. Sezonin e fundit, ai e ka mbyllur te Bylisi, ndërkohë që në vitin e largët 2009 ka qenë pjesë e 20vjeçarëve të Kombëtares shqiptare. Në sezonin 2009-2011 ka veshur fanellën e 21-vjeçarëve të Shqipërisë. Aktualisht pjesë e Luftëtarit nën urdhrat e stafit teknik janë dy "gardianët" Festim Miraka dhe Shkëlzen Ruci, ndërkohë që një sezon më parë dorezat e portierit bluzi i ka mbajtur Irakli Toçi. Aktualisht te Luftëtari janë të konfirmuar 12 futbollistë si pjesë organike e sezonit të ri futbollistik. Sakaq, nga sot priten të nisin punimet për zëvendësimin e tapetit aktual të fushës, ndërkohë që paralelisht do të fillojë edhe rikonstruksioni i ambienteve të brendshme të stadiumit "Gjirokastra".