Menez rikthehet në Milano, "Djalli" i shpëton stuhisë
Milani ka shpëtuar për "një fije". Stërvitja e djeshme e kuqezinjve në Çikago ka nisur rreth orës 18:30 dhe ka zgjatur një orë. Mirëpo, vetëm disa minuta pasi trajneri Vinçenco Montela dhe lojtarët ishin larguar nga fusha e stërvitjes, një stuhi e fortë ka goditur shtetin amerikan. Për fat të mirë, gjatë stuhisë, lojtarët e Milanit ishin akomoduar në hotel, por çfarë frike. Sakaq, përtej oqeanit nuk vijnë lajme të mira për "Djallin". Sulmuesi francez Zheremi Menez është larguar nga grumbullimi në SHBA dhe pritet që sot të prezantohet në Milano. Klubi kuqezi e ka justifikuar largimin e lojtarit me anë të një komunikate për shtyp, duke thënë se ka ardhur si pasojë e një dëmtimi muskulor, mirëpo mund të fshihet diçka tjetër. Lojtari së fundmi i ka irrituar drejtuesit e Milanit, pasi deri më tani ka refuzuar çdo ofertë që i ka mbërritur. Adriano Galiani, gjatë një takimi kokë më kokë me Menezin, i ka komunikuar futbollistit se nuk bën pjesë në planet e trajnerit Vinçenco Montela për sezonin e ardhshëm, mirëpo duket se Menez për momentin po pret vetëm një ofertë nga ana e francezëve të Olimpikut të Marsejës.