Sinisha Mihajloviç sulmon Milanin për shkarkimin
Pas aventurës zhgënjyese me Milanin, Sinisha Mihajloviç do të rifillojë nga Torino, e cila i ka krijuar kushtet trajnerit në merkato që të synojë Europën. Serbi, gjatë një konference për shtyp, tha: "Objektivi ynë është që të nderojmë fanellën e Torinos dhe të kthehemi në Europë në harkun e dy viteve. Këtu kam gjetur bazat e duhura për të punuar mirë, ekziston një grup i shëndetshëm dhe lojtarët kanë dëshirë të punojnë. Presidenti Kairo ka bërë lëvizje të rëndësishme për të përforcuar organikën tonë gjatë merkatos". Më pas, trajneri serb ka folur për debutimin në kampionat pikërisht kundër Milanit në "San Siro": "Do të jetë një ndeshje e vështirë, por unë do të kem një arsye më shumë për t'u paraqitur mirë. Në fund koha do të tregojë gjithçka, të gjithë e dimë se ku e kam lënë Milanin dhe ku ka përfunduar më pas", ka thënë ish-trajneri i kuqezinjve.