Gjoka do me çdo kusht Telushin, mund të ketë shkëmbim lojtarësh
Zbardhet plani “B” i Kukësit, Hasani mohon largimin
Bruno Telushi mund të transferohet te Kukësi. Në një kohë që Flamurtari ka nisur bisedimet për "të rrëmbyer" tre lojtarë të verilindorët, nuk është çudi që drejtuesit e dy klubeve të gjejnë gjuhën e përbashkët për të bërë edhe shkëmbime. Pakt ky që mund t'i linte të kënaqura që të dyja palët. Telushi pëlqehet nga presidenti Gjici, ndërsa është edhe vetë trajneri, ai që e do me çdo kusht. Vlonjati, me shumë gjasa, mund të shkëmbehet me një nga tre lojtarët e Kukësit, konkretisht me Edon Hasanin, Renato Malotën dhe Zhan Kariokën. Është pikërisht ky plani "B" i skuadrës së Kukësit për të marrë në ekip lojtarin e shumëdëshiruar nga vetë Ernest Gjoka. Së fundmi është përfolur për një kalim të mundshëm të Telushit në Kukës, klubi vlonjat as e mohon dhe as e pohon një fakt të tillë. Klubi dhe stafi teknik po përpilojnë listën e lojtarëve për sezonin e ri, por para se të kalohet te blerjet, fillimisht do të nisin rinovimet. Sikundër është shkruar, të parët që do të zgjasin kontratat e tyre janë Shameti dhe Musolli, ndërsa pezull mbeten Mici dhe Malota. Këta të fundit duken larg Kukësit në fakt. I pari ka ofertë nga Skënderbeu dhe Partizani, megjithatë më pranë tij janë të kuqtë. Madje, nga sa mësohet, ka një marrëveshje paraprake me mbrojtësin e majtë, i cili pëlqehet nga vetë Starova, ndërsa edhe trajneri Sormani ka dhënë OK-in për ta pasur në ekip. Malota, nga ana tjetër, duhet të vendosë për llogari të tij. Veç Partizanit dhe Flamurtarit, ai ka edhe një ofertë izraelite. Ekipi mbetet "enigmë",
por nuk përjashtohet mundësia që kapiteni i Kukësit sezonin tjetër të largohet nga Superiorja. Reagimi - Ndërsa Gjoka kërkon kapitenin e Flamurtarit, këta të fundit u janë përgjigjur me të njëjtën monedhë kuksianëve. Me anë të një deklarate në faqen e klubit kanë theksuar se janë në
bisedime me mesfushorët e Kukësit, Zhan Karioka dhe Edon Hasani. Por, ky i fundit duket se u mbyll derën vlonjatëve, paçka se e pohon ofertën. Në një postim në "Facebook", mesfushori shkodran ka reaguar duke thënë: "Çdo lajm që qarkullon nëpër portale të ndryshme është i
pavërtetë. Dua të sqaroj se unë jam lojtar nën kontratë me ekipin e Kukësit edhe për sezonin e ardhshëm dhe do ta respektoj atë deri ditën e fundit për të arritur objektivat që kemi. Nëse dikush ka menduar për mua, e vlerësoj dhe e falënderoj! Forca Kukësi!". Skerdilaid Sulozeqi