"Me 3-4 përforcime kapim Europën"

Ilir Daja para ndeshjes ka dhënë një intervistë për televizionin e Novi Pazarit, teksa ka evidentuar edhe klimën miqësore që ka gjetur në prag të kësaj miqësoreje. "Fillimisht, i falënderoj drejtuesit e Novi Pazarit për këtë mundësi të krijuar dhe për bashkëpunimin mes dy klubeve për të cilin folëm. Gjatë kësaj periudhe në Zllatibor kemi punuar me seriozitet dhe kemi gjetur kushte ideale. Për sa i përket futbollit shqiptar mund të them se vitet e fundit kanë sjellë një zhvillim të vrullshëm. Ndryshimet mes futbollit shqiptar dhe atij serb janë ulur ndjeshëm, edhe pse duhet thënë se ka ende diferenca. Shkolla e ish-Jugosllavisë ka qenë një nga më të mirat e futbollit në Ballkan. Megjithatë, tani gjërat kanë evoluar. Tani në Serbi, Cervena Zvezda dhe Partizani bëjnë diferencën, njësoj si në Shqipëri, ku 3-4 skuadra kanë bërë shumë përpara. Në sezonin e fundit, Tirana nuk arriti të realizonte objektivat për shumë arsye. Këtë vit po punojmë me seriozitet për t'u rikthyer aty ku tifozët presin dhe të gjithë duan. Javën e ardhshme, kur të kthehemi në Tiranë, besoj se do të përforcohemi me 3- 4 elementë dhe do të synojmë minimalisht Europën. Klubi ka punuar gjatë kësaj periudhe dhe besoj se do të bëhet më mirë", ka thënë trajneri i Tiranës.