Vanda Nara zbulon ofertën e tretë të De Laurentisit

Bashkëshortja-menaxhere e Mauro Ikardit bëri publike ofertën e tretë që i kishte paraqitur Aurelio De Laurentis. Gjatë një prononcimi për emisionin "Infama" (transmetohet në një kanal argjentinas), Vanda shpjegoi: "Napoli i ka ofruar Ikardit dhjetë milionë euro në vit. 7 prej të cilave i merr si rrogë, ndërsa tre të tjerat nga të drejtat e imazhit. Veç të tjerash, De Laurentis na ka propozuar që të bëhet ortaku ynë në shoqërinë e imazhit të Mauros. Ata i kanë ofruar 50 milionë euro Interit. I gjithë Napoli do Ikardin. Por ai është kapiten i Interit. Juventusi e kërkoi në qershor, por Interi nuk e la të largohej. Roli në film që më është propozuar nga De Laurentis? Nuk mund të shkoj dot në Londër sepse jam shtatzënë. De Laurentis më ofroi tani që të drejtoja një emision në një televizion italian", tha Nara. Në këtë drejtim, duket se bashkëshortja-menaxhere është dorëzuar dhe Ikardi qëndron zikaltër. Ndërsa Napoli ka paralajmëruar se do t'i bëjë Interit edhe një ofertë të katërt.