Krijohet në Angli "Premier Liga 2" ku do të aktivizohen të rinjtë
Risia
Duke filluar nga ky sezon, në kampionatin anglez do të ketë një tjetër ligë. Ajo do të quhet "Premier Liga 2" dhe në të mund të marrin pjesë të gjitha skuadrat e të rinjve. Ditën e djeshme është prezantuar formati i kësaj lige që do të ketë dy divizione. Në divizionin e parë do të marrin pjesë skuadrat: Arsenal, Çelsi, Derbi Kaunti, Everton, Leiçester Siti, Liverpul, Mançester Siti, Mançester Junajtid, Riding, Sauthempton, Sanderlend dhe Totenhem. Ndërkohë, në divizionin e dytë do të jenë ekipet: Aston Vila, Blekburn Rovers, Brajton, Fulham, Midëllsbrou, Njukasëll, Noruiç Siti, Suonsi Siti, Stok, Uest Bromuiç Albion, Uest Hem dhe Volves. Të gjitha skuadrat do të kenë mundësinë për të aktivizuar në këto kampionate futbollistët e rinj dhe në këtë mënyrë do të furnizojnë me talente skuadrat e para. Liga ka edhe disa rregulla të caktuara, me të cilat janë njohur të gjitha ekipet pjesëmarrëse.