Erikson: Allërdajs zgjedhja e duhur, do bëjë mirë tek Anglia

Zgjedhjen e Sem Allërdajs në krye të pankinës së Anglisë e ka përshëndetur edhe ish-trajneri Sven Goran Erikson. Ai ka thënë se trajneri i ri është shumë autoritar dhe ka dëshirë për të punuar. "E njoh shumë mirë Allërdajsin dhe kam miqësi me të prej disa vitesh. Është një trajner i mirë, por mbi të gjitha një njeri shumë i mirë. E dashuron futbollin dhe organizimin në fushën e lojës. Kudo që ka qenë ka bërë mirë dhe ka pasur rezultate pozitive. Mendoj se Anglia ka bërë zgjedhjen e duhur dhe i uroj fat Allërdajsit në këtë sfidë të re", ka thënë Erikson. "Big Sam" u zgjodh në krye të stolit të "tre luanëve" pasi Roi Hoxhson dështoi në kampionatin europian dhe u eliminua nga Islanda. Pasi bënë disa analiza dhe intervista pune, drejtuesit e federatës angleze ia besuan këtë post trajnerit të Sandërlendit, Allërdajs.