Karlo Ançeloti është trajneri perfekt për të drejtuar Bajernin
Pak trajnerë e kuptojnë ekuilibrin e duhur aq mirë sa Karlo Ançeloti. Pas dy javësh stërvitje me të, unë besoj plotësisht se ai është njeriu perfekt për të drejtuar Bajernin e Mynihut në këto momente. Ai është një trajner italian, i cili ka drejtuar Milanin, Çelsin, PSG-në dhe Realin e Madridit, duke fituar tituj kombëtarë dhe ndërkombëtarë. Ai di si t'u flasë lojtarëve dhe është e qartë që është i emocionuar që ndodhet këtu. E gjitha kjo na bën ne të ndihemi shkëlqyeshëm. Unë shpresoj që miqtë tanë amerikanë ta shijojnë këtë atmosferë brenda skuadrës, ndërsa ne luajmë në këtë tur. Ishte me siguri shumë shpresëdhënëse që të shikoje sesa fanella të Bajernit ndodheshin në aeroport për të na pritur kur erdhëm. Mezi po e pres ndeshjen e parë në Çikago dhe pastaj do të shkojmë në Sharlot dhe Nju Jork. Të qenit futbollist profesionist do të thotë që unë e kam pasur gjithnjë në kokë futbollin. Kur shoh lajmet për shembull, nuk ka rëndësi se për çfarë teme bëhet fjalë, ajo që unë vë re janë fëmijët që mbajnë veshur fanellat e Barcelonës, Mançester Junajtid, Realit të Madridit apo Bajernit të Mynihut. Është e rëndësishme të mendosh për këta fëmijë kur ne shkojmë në ture të tilla, siç është ky i SHBA-së. Të gjithë Ronaldot, Riberitë dhe Nejmarët e rinj, të cilët mund të jenë në Indi, Afrikë apo Amerikë, tregojnë sesa i rëndësishëm është futbolli në të gjithë botën. Për një klub të madh siç është Bajerni, me tifozë anembanë botës, ky është një detyrim që ne kemi për ta. Kur ne shkojmë në ture të tilla, shumë bëjnë sakrificën e udhëtimeve 10-ditore, me fluturime të gjata për të ndjekur këto tri ndeshje në tri qytete të ndryshme. Dhe, pa dyshim, kjo është e lodhshme. Por unë jam i bindur se askush që e ka parë se me çfarë entuziazmi pritet "International Champions Cup" në Azi dhe Afrikë, do të vinte në dyshim rëndësinë e jashtëzakonshme të turneut. Tifozët janë pjesa më e rëndësishme e futbollit dhe sot ata janë kudo. Ata na ndjekin nga televizori, apo "online". Nuk mund të pretendoj që çdo tifoz, i cili dëshiron të na shohë të luajmë, mund të vijë për të na ndjekur, edhe kur ne vizitojmë vendin e tij, por është shumë e rëndësishme që ata ta shohin që ne jemi të vërtetë, ne jemi të prekshëm dhe jemi atje. Këto ndeshje luhen në vende që ata i njohin dhe, në këtë mënyrë, ata ndihen më pranë nesh. Nuk janë vetëm ata që përfitojnë nga vajtja jonë atje, por edhe ne kemi shansin për të mësuar gjëra të reja nga kultura dhe mënyra e tyre e jetesës. Ky është gjithashtu një shans i çmuar për ne që të reflektojmë në atë që duam nga vetja dhe mendojmë ndryshe. Përpara se të niseshim në SHBA, ne luajtëm një ndeshje të vogël ndaj Landshutit. Vetëm 2 ditë më vonë do të takohemi me Milanin në Çikago. Ky është ekuilibri që ne duhet të arrijmë dhe zhvillojmë identitetin tonë si skuadër.