Bajernin e presin 3 ndeshje që do të luhen në kushte ekstreme

Turi 11-ditor i Bajernit në SHBA nuk do të jetë aspak çlodhës. Si brenda, ashtu edhe jashtë fushe duhet punuar me intensitet, ndërkohë që Lahm me shokë me të zbritur në aeroportin e Çikagos, kanë gjetur temperatura deri në 30 gradë. Lojtarët duhet të ambientohen shpejt me diferencën 7-orëshe me Europën, sepse që në mëngjesin e 28 korrikut ( në orën 03: 00) kampionët e Gjermanisë do të matin forcat në ndeshjen e parë të "International Champions Cup" përballë Milanit. "Jemi në një kamp stërvitor dhe jo me pushime", paralajmëroi Riberi, i cili u prezantua në SHBA me një pamje të re. Pasditen e së martës, Ançeloti zhvilloi edhe stërvitjen e parë në "Soldier Field Stadium". Për trajnerin italian, ndeshja ndaj Milanit, skuadra ku ai bëri epokë si lojtar dhe trajner, do të jetë shumë emocionuese: "Është logjike, një ndeshje kundër Milanit është për mua gjithnjë speciale. Unë jam gjithnjë një tifoz i tyre". Pas Milanit, do të jetë radha për të udhëtuar drejt Sharlot, ku një tjetër skuadër e qytetit të Milanos, Interi, do të përballet me ta në kushte edhe më ekstreme atmosferike (35 gradë celsius). Ndërsa më 3 gusht ata do të ndeshen në Nju Jork, ku parashikohen temperatura edhe më të larta se në Çikago (31 gradë) kundër Realit.