U ofrohet një ish-kapiten kuqezi
Vlonjati ka mbajtur shiritin e Kombëtares U-17, produkt i akademisë së Juventusit
Merkatoja e Partizanit ka hyrë në një fazë kritike, pasi në vend që të shtohen prurjet, po largohen edhe ata që u prezantuan në fillim të procesit, si Volas dhe së fundmi Arapi. Megjithatë, drejtuesit kanë besim se deri në fund të gushtit grupi do të plotësohet me elementët e duhur. Prej ditësh stafi ka nisur bisedimet me disa futbollistë, kryesisht me tipare sulmuese, por ende nuk është arritur finalizimi me ndonjërin prej tyre. Afrimet priten nga tregu i huaj, kryesisht nga Italia. Përpos emrave që janë publikuar ditë më parë në "Panorama Sport", si dyshja sulmuese Mama Baba Thiam- Manuele Fishnaler, mësohet se në bisedime janë përfshirë edhe disa njohje të vjetra të teknikëve italianë të Partizanit. Së fundmi, drejtuesve u është ofruar edhe ish- kapiteni i Kombëtares shqiptare U-17, ku ka shënuar dhe një gol, si dhe është pjesëtar i kuqezinjve U- 19, Françesko Tahiraj. Vlonjati i datëlindjes 21 shtator 1996 është produkt i akademisë së Juventusit, ku ka qenë pjesë nga viti 2006 deri në 2014ën, kur juventinët e shitën te rivalët e Torinos për 75 mijë euro. Mesfushori me tipare sulmuese, pas karrierës me moshat në Itali me Juventusin, Karpin dhe Torinon, në gusht të 2015- ës nënshkroi kontratë si profesionist me klubin slloven Zavrc. Në fillim të këtij sezoni, Tahiraj ka kaluar te klubi tjetër slloven, Aluminij, me të cilin ka luajtur tri ndeshje si zëvendësues. Françesko Tahiraj nuk është një emër i panjohur për stafin teknik italian të Partizanit, pasi më herët ata kanë punuar me moshat në shtetin fqinj. Mësohet se lojtari i kombëtareve kuqezi u është rekomanduar drejtuesve të Partizanit, por për afrimin e tij vendos trajneri Adolfo Sormani, i cili ka marrë përgjegjësitë e përzgjedhjeve të fundit për ekipin në merkato.