E rrallë, amerikani merr pasaportë shqiptare
32-vjeçari i bashkohet kombëtares pas turneut miqësor
Nëse vetëm pak muaj më parë rreth 200 mijë shqiptarë provuan fatin me lotarinë amerikane, rekord historik i aplikimeve (rreth 13 për qind e popullsisë në vend), ndodh që edhe shtetas amerikanë të lënë "Tokën e premtuar" të lakmuar nga të gjithë në botë për atë të... Shqiponjave. Dhe, precedenti i rrallë vjen nga sporti. Është basketbollisti 32-vjeçar Rashaun Broadus, i cili zyrtarisht është shtetas shqiptar. E kishte paralajmëruar pak ditë më parë presidenti i Federatës Shqiptare të Basketbollit, Avni Ponari, në konferencën për shtyp përpara nisjes për në turneun miqësor të Qipros për një natyralizim me kombëtaren. Dhe ashtu ndodhi. Verdikti është dhënë më 22 gusht nga Presidenti i Republikës, Bujar Nishani, me dekretin për dhënien e shtetësisë shqiptare nr. 9725 për basketbollistin. "Në mbështetje të nenit 92, pika 'c', dhe nenit 93 të Kushtetutës, si dhe nenit 9, pika 7, e nenit 20 të ligjit nr. 8389, datë 05.08.1998, 'Për shtetësinë shqiptare', të ndryshuar, bazuar në propozimin e ministrit të Arsimit e Sportit, i jepet shtetësia shqiptare me kërkesë të tij personit të mëposhtëm: RaShaun Eneal William Evertt Broadus", thuhej në dekretin e Kreut të Shtetit, Bujar Nishani.
Karriera - Në fillimet e karrierës së tij, Broadus ka luajtur më skuadrën universitare të "Brigham Young" në Jutah përpara se të transferohej në Europë. Aventura e tij e parë jashtë Amerikës ka qenë në kampionatin rumun me bardheblutë e CSU Brasov, ku luajti vetëm një sezon ( 20082009). Së fundmi, Broadus aktivizohet në kampionatin polak me MKS Dabrova Gorniza. Pas grumbullimit të zhvilluar në kryeqytet, kombëtarja mori pjesë në turneun miqësor të Qipros me pjesëmarrjen e skuadrës vendëse, Estonisë dhe Katarit. Në ndeshjen hapëse, kuqezinjtë e koshit do
të humbnin me rezultatin e thellë 94-51. Në disfavor të tanëve u mbyll edhe takimi i dytë, por kësaj here me një rezultat më të ngushtë 71- 64 kundër Estonisë, ndërsa do ta ulnin siparin me triumfin 7170 në "frymën e fundit" ndaj rivalëve të Katarit.