Mazrekaj, Ibrahimi dhe Ramadani marrin shtetësi shqiptare
Partizani kaloi një kalvar procedurash për pajisjen me vizë hyrëse në Rusi për dy futbollistët me pasaportë kosovare, Labinot Ibrahimi dhe Ylber Ramadani. Nga frika se nuk do të merrnin vizë për dy lojtarët, pasi Rusia nuk e njeh Kosovën si shtet dhe pasaportën e saj, klubi me procedurë të veçantë ka kërkuar pajisjen me shtetësi shqiptare për tre lojtarët që kanë pasaportë kosovare, Mentor Mazrekaj, Labinot Ibrahimi dhe Ylber Ramadani. Falë bashkëpunimit me ambasadën ruse në Shqipëri, Partizani arriti të marrë viza për Ibrahimin dhe Ramadanin në përfaqësinë diplomatike ruse në Beograd, ndërsa Mazrekaj nuk aplikoi se ishte i dëmtuar. Por ditën që kosovarët morën vizat në Beograd, 16 gusht 2016, Presidenti i Republikës, Bujar Nishani, ka dekretuar dhënien e shtetësisë shqiptare për lojtarët e Partizanit, Mazrekaj, Ibrahimi dhe Ramadani. Pra, Partizani e ka pasur gati edhe planin B për të pasur lojtarët kosovarë në transfertën e Krasnodarit. Ja dekreti i presidentit për tre lojtarët e Partizanit: "Dekret për dhënie të shtetësisë shqiptare nr.9724. Në mbështetje të nenit 92, pika "c", dhe nenit 93 të Kushtetutës, si dhe nenit 9, pika 7, e nenit 20 të ligjit nr. 8389, datë 05.08.1998, "Për shtetësinë shqiptare", të ndryshuar, bazuar në propozimet e ministrit të Arsimit dhe Sportit, DEKRETOJ: Neni 1. U jepet shtetësia shqiptare me kërkesë të tyre personave të mëposhtëm: 1.Labinot Faruk Ibrahimi, 2.Ylber Latif Ramadani, 3. Mentor Xhemajl Mazrekaj. Neni 2. Ky dekret hyn në fuqi menjëherë. Tiranë, më 16.08.2016. Nr.i dekretit: 9724. PRESIDENTI I REPUBLIKËS, BUJAR NISHANI".