Elbasani-Bylisi, miqësore për të matur forcën

Elbasani do të zhvillojë ditën e sotme një takim miqësor me skuadrën e Bylisit, në kuadër të përgatitjeve për këtë sezon të ri futbollistik. Muharrem Dosti do të shohë më konkretisht gjendjen e futbollistëve, veçanërisht atë të mesfushorit serb, i cili vetëm para dy ditësh ka dalë në stërvitje me verdheblutë dhe do shihet nëse është një lojtar që mund t'u bëjë punë elbasanasve për këtë sezon. Kjo përballje miqësore pritet të shfrytëzohet edhe për të diskutuar dy klubet rreth të ardhmes së Gavës dhe Hyshmerit, të cilët stërviten me Elbasanin, por ndërkohë janë lojtarë të Bylisit. Ballshiotët dhe verdheblutë me shumë gjasa do të jenë dy nga ekipet rivalizuese për vendin e parë në Grupin B, duke pretenduar kështu ngjitjen në Superiore, ndaj edhe ky test do të jetë i rëndësishëm përpara startimit të kampionatit në Kategorinë e Parë. Për sa i përket merkatos, ajo do të jetë e hapur deri në mbylljen e saj dhe verdheblutë do të mundohen që ta kompletojnë skuadrën në të gjitha repartet, pasi e shohin si mundësinë e vetme për të qenë rivalizues këtë sezon. Vladimir Mema