Luiza Gega: Rio, fundi i një supersezoni

Ndërsa premiera e saj olimpike në "Rio 2016" nuk rezultoi pozitive pas dëmtimit në këmbë, atletja Luiza Gega e ka hedhur pas shpine me fokus të ardhmen. Në një postim në "Instagram", në ceremoninë e mbylljes së Lojërave, flamurmbajtësja kuqezi u shpreh: "U erdhi edhe fundi Lojërave Olimpike 'Rio 2016'. Edhe pse do të doja të mos isha e dëmtuar ku do kisha dhënë më të mirën time, përsëri jam kënaqur shumë. Ka qenë një eksperiencë vërtet e bukur. Gjithashtu ishte edhe fundi i këtij sezoni ku ndihem vërtet e mbushur me atë që arrita këtë vit: 5 rekorde kombëtare, rekord i kampionatit ballkanik i sallave të mbyllura në 1500 m si dhe kampione Ballkani, normë olimpike në dy disiplina, nënkampione Europe. Por jam edhe shumë optimiste për çfarë më pret në të ardhmen", ishte postimi përmbyllës nga këto Lojëra, ndërsa nuk harroi pa falënderuar trajnerin e saj Taulant Stërmasi dhe sponsorët që e kanë mbështetur përgjatë kësaj kohe. Delegacioni shqiptar mbërrin sot, në 11:00, në aeroportin "Nënë Tereza".