Gjimshiti në modë, Krotone i ofron një vend titullari

Atalanta s’e do, por mund të mbetet në Serinë A

Mbrojtësi i Kombëtares shqiptare të futbollit, Berat Gjimshiti, duket se mund të ndryshojë skuadër në ditët e fundit të merkatos verore. Shkak për këtë është sigurisht hapësira e pakët që ai po gjen në radhët e Atalantës. Destinacioni i radhës për Gjimshitin pritet të jetë sërish Seria A, këtë radhë skuadra e sapongjitur në elitë, Krotone. Këta të fundit janë duke kërkuar përforcime në mbrojtje dhe së fundmi ka dalë ideja e afrimit të Gjimshitit në formën e huazimit, një lëvizje që do t'i shkonte për shtat edhe futbollistit shqiptar duke qenë se do të kishte më shumë hapësira për të luajtur. Në ndeshjen hapëse të Serisë A, ku Atalanta luajti në shtëpi ndaj Lacios dhe humbi 3-4, Gjimshiti nuk u grumbullua fare nga trajneri Gasperini. Futbollisti me origjinë nga Presheva, i rritur në Zvicër, u transferua në merkaton e janarit nga Zyrihu tek Atalanta me shpresën se do të arrinte të bëhej i rëndësishëm në Serinë A, por gjysma e dytë e sezonit të shkuar e pa atë të aktivizohej për bergamezët vetëm në javët e fundit të kampionatit. Ky fakt e la Gjimshitin jashtë "EURO 2016", pasi trajneri De Biazi nuk i besoi atij një vend në listën përfundimtare me 23 lojtarë të Shqipërisë. Në kualifikueset e Botërorit 2018, Gjimshiti mund të shndërrohet në futbollist titullar të Kombëtares, duke qenë se ish-kapiteni Cana e mbylli me kuqezinjtë.