Maroku vjen me yjet në Shkodër

Futbollistët e Juves dhe Napolit në "Loro Boriçi"

Pas pjesëmarrjes në Europian, të besuarit e De Biazit duan që të rikonfirmojnë edhe një herë mrekullinë e bërë realitet dy vite më parë. Kualifikimi në Botërorin "Rusi 2018" është disa herë më i vështirë, por forma e mirë është patjetër një detyrim që të tregohet. Përpara se të nisin sfidat e vlefshme për këto kualifikuese, skuadra e De Biazit do të zbresë në fushë në një takim testues. Jo vetëm një test për impiantin e rikonstruktuar, por edhe për vetë skuadrën kuqezi. Përballë Shqipërisë në këtë ndeshje do të jetë një ekip me… yje. Maroku ka publikuar listën me 27 futbollistë që do të jenë të gatshëm për trajnerin Herve Renard. Në të bie në sy prania e lojtarëve të Juventusit dhe Napolit. Mehdi Benatia dhe Omar El Kaduri janë dy nga yjet e kësaj skuadre, të cilët do të zbresin në tapetin e stadiumit më të ri në Shqipëri. Në këtë listë ka futbollistë që luajnë në skuadra si Lilë, Fejnord, Tuente, Deportivo e gjithashtu është edhe një futbollist që figuron te skuadra e Realit të Madridit.