Man.Junajtid i bën çmimin Shvajnshtaigerit, 4 mln €
Bastian Shvajnshtaiger dhe Mançester Junajtid vështirë se do të vazhdojnë bashkëjetesën e tyre në "Old Trafford". Në këtë javë të fundit merkatoje që ka mbetur, mesfushori gjerman duhet të gjejë një akomodim të ri, përndryshe e presin minimalisht 4 muaj të trishtë në pankinë (të paktën deri në janar kur rihapet merkatoja) përkrah Zhoze Murinjos. Ky i fundit nuk beson më te 32-vjeçari, por në të njëjtën kohë kërkon t'u bëjë një nder drejtuesve të klubit të tij, duke u kursyer "djajve të kuq" një pagë monstruoze prej 14 milionë eurosh në sezon. Prandaj, nga dje Mançester Junajtid ka nxjerrë zyrtarisht në shitje Shvajnshtaigerin, për të cilin ka kërkuar 2.5 milionë paund për kartonin (4 milionë euro). Në të tilla shifra, të gjitha klubet që janë të interesuara për lojtarin, duke futur këtu edhe Juventusin janë të lira që të kontaktojnë me vetë Shvajnin dhe të tentojnë gjetjen e një akordi, brenda datës 1 shtator.