Sherr me Guardiolën, Hart largohet nga stërvitja

Sot kundër Steauas, Pep mund t'i dhurojë sfidën e lamtumirës

Marrëdhënia mes Pep Guardiolës dhe Xho Hartit ka prekur fundin. Ditën e djeshme, trajneri dhe portieri i Mançester Sitit kanë debatuar ashpër mes tyre dhe mediat raportojnë se gardiani anglez ka braktisur stërvitjen. Në prag të ndeshjes së kthimit të "Play Off"- it kundër Steauas së Bukureshtit, situata në kampin e Mançesterit nuk është shumë pozitive. E vetmja gjë që qetëson tifozët është fitorja e ndeshjes së parë me rezultatin 5- 0.

Konferenca - Në prag të ndeshjes së kthimit të "Play Off"- it të Ligës së Kampionëve mes Steauas dhe Mançester Sitit, trajneri Pep Guardiola ka mohuar zërat për një përplasje mes tij dhe portierit Hart dhe ka thënë se ditën e sotme mund të ketë një shans për të luajtur si titullar. "Unë dhe Hart kemi raport të shkëlqyer. Kam folur me të në seancën stërvitore dhe e keni parë të gjithë që e shohim njëri-tjetrin në sy. Kjo është shumë e rëndësishme në një skuadër futbolli. Ai vazhdon të jetë lojtar i Sitit dhe do të ketë mbështetjen time deri sa të jetë pjesë e skuadrës. Nuk mund të them asgjë më tepër lidhur me këtë situatë, por dua të shtoj se ai ka shansin të luajë titullar dhe të tregojë vlerat e tij, ashtu si portierët e tjerë të Sitit", ka thënë Guardiola. Gjatë fjalës së tij, ai foli edhe për rëndësinë e ndeshjes duke kërkuar një tjetër fitore nga skuadra e tij. "Nuk mund të flasim me siguri që jemi kualifikuar. Futbolli është i çuditshëm dhe unë kam mësuar shumë nga ndeshja mes Milanit dhe Liverpulit. Italianët ishin duke fituar 3-0 dhe kishin në ekip lojtarë si Maldini dhe Kafu, por në fund arritën të triumfonin anglezët. Pavarësisht se kemi fituar 5-0, do të luajmë sërish për fitore", ka thënë mes të tjerash tekniku spanjoll. Ai nuk ka dashur të japë asnjë informacion në lidhje me portierin Klaudio Bravo, duke thënë se për momentin vazhdon të jetë lojtar i Barcelonës, por edhe mbi formacionin që do të zbresë sot në fushën e lojës. Ndeshja mes Sitit dhe Steauas së Bukureshtit do të luhet në orën 20:45.