Kina sulm botës, ja pse nuk sundon dot në Gjermani

Kina po përpiqet të shtrijë tentakulat si në futboll dhe Europë. Sipërmarrje, blerje aksionesh në klube europiane, transferime të çmendura me megapaga, një vizion i çmendur i presidentëve. Gazeta gjermane "Focus" u jep përgjigje disa pyetjeve në lidhje me ëndrrën kineze. Kinezët blenë WBA-në, Aston Vilën, kanë 13% të aksioneve të Mançester Sitit. Ata zbarkuan edhe në Itali duke blerë dy klubet e mëdha si Interin dhe Milanin. Në Spanjë kanë 20% të Atletiko Madridit dhe 25% të Espanjolit dhe në Franca zotërojnë 20% të Lionit. Kinezët po forcojnë kampionatet e tyre duke shpenzuar çmendurira për lojtarët nga Europa. Së fundmi, aziatikët transferuan Graciano Pelenë, Renato Auguston, Hulk dhe shumë të tjerë. Në merkaton e dimrit vetëm Liga e dytë shpenzoi më shumë sesa Bundesliga. Lind pyetja: Pse po e bëjnë këtë kinezët? Ky ka qenë një nga planet e presidentit Xi Jinping që nga viti 2015, i cili shprehu tri dëshira për futbollin: Kina duhet të kualifikohet për një Botëror; Kina duhet të organizojë një Botëror dhe Kina duhet të fitojë një Botëror. Kina dëshiron të pushtojë edhe Gjermaninë, por rregulli 50+ 1 i dispozitave të statutit të Ligës gjermane nuk e lejon që një investitor të marrë shumicën e aksioneve.