Vllaznia fiton miqësoren e tretë, Çinari “show”
Dy lojtarët e huaj nuk bindin, sulmi mbetet i paplotësuar
Vllaznia ka arritur një tjetër fitore në për balljet miqësore të zhvilluara në Berane, ku po kryen edhe fazën përgatitore verore. Dje kuqeblutë kanë mundur ekipin vendës të Fk Berane me rezultatin 3-0, gola të cilët u shënuan në pjesën e dytë të miqësores nga lojtarë shkodranë që u aktivizuan në pjesën e dytë. Tafili nga pika e bardhë e penalltisë, si dhe dy herë Çinari. Kundërshtari nuk është i një niveli të lartë, pasi Berane militon në Ligën e Dytë të Malit të Zi. Pjesa e parë e takimit ka përfunduar me shifrat 0-0. Në 45 minutat e para të takimit, trajneri Armando Cungu aktivizoi në vijën sulmuese dy lojtarë të huaj të ardhur së fundmi për provë, slloveni Kastrevec dhe maqedonasi Denkovski. Stafi teknik u dha mundësi që të tregonin veten në
këtë miqësore, por paraqitja e tyre ka qenë zhgënjyese. Ndërsa përkrah tyre janë aktivizuar: Në portë Selimaj; Në mbrojtje Gurishta nga e djathta, Cicmil e Bicaj në qendër dhe Marku nga e majta; Në mesfushë u rreshtuan Krymi dhe Bardulla në qendër, ndërsa Shtubina dhe Hoxha në krahë. Në pjesën e dytë, trajneri Cungu ka hedhur në fushën e lojës të gjithë lojtarët që ka pasur në dispozicion. Në këtë pjesë ekipi shkodran ka arritur të shënojë fillimisht me penallti me anë të Tafilit në minutën e 52-të. Ndërsa dy golat e tjerë mbajnë firmën e mesfushorit me tipare sulmuese, Erald Çinari. Ai hyri në fushë në minutën e 60-të, kur zëvendësoi kapitenin Shtubina. Çinari ka arritur të shënojë një dygolësh, pikërisht në prezencën e tij të parë në takimet miqësore. Shkodrani i ri ka qenë i dëmtuar dhe për një kohë të gjatë ka qenë në fazë riaftësimi. 19-vjeçari duket se e ka lënë pas dëmtimin dhe që në ndeshjen e parë ka treguar vlerat e tij. Në sezonin e shkuar, Çinari ka qenë një nga golashënuesit më të mirë të Vllaznisë, pavarësisht se nuk është aktivizuar rregullisht si titullar.
Dy lojtarët nuk kalojnë provën
Në miqësoren e djeshme janë aktivizuar edhe dy sulmuesit e ardhur për provë, slloveni Ziga Kastrevec, si dhe maqedonasi Kristjan Denkovski. Ata janë aktivizuar gjatë pjesës së parë të takimit, por paraqitja e tyre ka qenë zhgënjyese. Pavarësisht se nga stafi nuk ka një vendim zyrtar, nga burime pranë klubit bëhet me dije se prova e dy sulmuesve të huaj ka marrë fund dje dhe ata do të lihen të lirë që të largohen. Me sa duket, ankthi për gjetjen e një sulmuesi do vazhdojë të jetë i pranishëm te Vllaznia deri ditën e fundit të merkatos. Drejtuesit e klubit po bëjnë të pamundurën që në ditët e mbetura të merkatos të gjejnë alternativat e duhura për repartin ofensiv, që kryesisht priten nga jashtë vendit. Mbase rasti i djeshëm me Çinarin mund të bëjë që drejtuesit të besojnë më shumë te të rinjtë shkodranë.