Bind Flamurtari, thyhet Apolonia
Skuadra e trajnerit Gugash Magani merr formë, fierakët gjithsesi japin shpresë
Apolonia ka pësuar një tjetër humbje në miqësoren e zhvilluar ndaj Flamurtarit. Dy gola në pjesën e parë u kanë mjaftuar vlonjatëve për të fituar një ndeshje jo të lehtë për ta. Kjo sepse fierakët, pavarësisht rezultatit, kanë dhënë shenja pozitive. Takimi filloi i bukur dhe i shpejtë, kjo për meritën e Flamurtarit që i jep që në fillim lojës së tij karakter sulmues. Por Apolonia e vendosur mirë në fushë luan me qetësi dhe saktësi në mbrojtje dhe nuk harron dhe të sulmojë në portën e Halilit. Megjithatë, në minutën e 11të, ata nuk kanë mundur të ndalojnë një kundërsulm të shpejtë të miqve, që e gjejnë të papërgatitur duke pësuar
golin e parë, autor i të cilit ishte Fazliu. Apolonia ndërmerr disa sulme të shpejta, por pa arritur të çajë në mbrojtjen mike. Atë që nuk e bëjnë fierakët, e realizojnë në minutën e 24-t miqtë. Vlonjatët, duke përfituar edhe nga një dalje e gabuar e portierit Cako, arrijnë të dyfishojnë rezultatin
me anë të Danilos. Braziliani, i ndodhur fare pranë portës mbas një harkimi nga krahu i majtë i sulmit, s'e ka të vështirë ta dërgojë topin në rrjetë. Kërkon të reagojë Apolonia, por është e pafuqishme në sulm dhe Uzuni është shumë pak për fierakët që të rrezikojë e të shënojë në portën mike.
Ata nuk arrijnë të kalojnë asnjëherë mbrojtjen vlonjate. Pjesa e dytë fillon me zëvendësime të shumta për të dy ekipet. Por tashmë loja, në vend që t'i ulet ritmi, ka më shumë agresivitet nga të dy ekipet. Gjithsesi vlonjatët janë më të qartë në lojën e tyre dhe sulmojnë më shumë në portën
vendase, por pa mundur që të shënojnë gola të tjerë. Nga ana tjetër, Apolonia sulmon me forca të shumta ku protagonistë bëhen Uzuni dhe lojtari i ri Hasani, që rrezikojnë seriozisht disa herë portën mike, por pa mundur të shënojnë dhe të shkurtojnë diferencën e golave.