UEFA e dinte që Anderlehti bleu arbitrin dhe e dënoi vite më vonë

Shefave të futbollit europian u janë dhënë prova për një prej skandaleve më të mëdha të trukimit në futboll, por ata kanë reaguar shumë vite më vonë. Skandalin e zbulon investigimi i BBC-së. Në vitin 1984, presidenti i klubit të Anderlehtit korruptoi arbitrin përpara fitores në gjysmëfinalen e Kupës UEFA ndaj Notingem Forestit. Faktet u bënë më në fund publike në vitin 1997 dhe Anderlehti u pezullua me një vit nga kompeticionet europiane. Por prova të reja tregojnë se UEFA e ka mësuar se arbitri kishte marrë ryshfet që në vitin 1992. Katër vite pasi skuadra e Brajan Klafit fitoi Kupën e dytë të Kampioneve, ata u përballën me Anderlehtin në gjysmëfinalen e Kupës UEFA. Pasi fituan bindshëm 2-0 ndeshjen e parë, Forestit iu akordua kundër një penallti e dyshimtë dhe iu anulua edhe një gol në ndeshjen e kthimit, duke u eliminuar në fund me rezultatin e përgjithshëm 3-2. Por e vërteta pas atyre vendimeve arbitrare u zbulua vetëm pas një hetimi kriminal që përfundoi në vitin 1997 dhe Anderlehti e pranoi se kishte paguar gjyqtarin spanjoll, Emilio Guruceta Muro. Në fillim UEFA këmbënguli se ajo nuk mund të merrte masa, pasi ryshfeti ishte dhënë më shumë se 10 vite më parë, por në fund u vendos që Anderlehti të pezullohej me një vit nga Europa. Tani, programi "Inside Out" i "BBC"-së zbulon se UEFA e kishte dosjen me provat e trukimit që në vitin 1992.

Dosja - Provat tregonin se menjëherë pas ndeshjes, presidenti i Anderlehtit, Konstant Vanden Shtok, kishte kontaktuar me një bandit lokal, Zhan Elst. "Elst kontaktoi një mik të tij në rajon, i cili shkoi në Alikante dhe foli me arbitrin. Gjyqtari i tha: 'OK, do ta bëj unë për 1.2 milionë franga belge'", tregon gazetari belg Frenk Van Laeken. Por, një tjetër bandit, Ren Van Aken, i mësoi detajet e marrëveshjes dhe i bëri shantazh klubit. Van Aken më vonë i dërgoi informacionet në federatën belge gjatë dy viteve 1990-1992. "Nëse të bie në dorë diçka e tillë, një tufë me dokumente për ndeshje të mundshme të trukuara, ti duhet të hetosh", thotë Van Laeken. Federata belge tha se nuk kishte fuqinë për të hetuar korrupsionin dhe ia përcolli informacionin UEFA-s, por asnjë sanksion nuk u mor për më shumë se 4 vite. Pavarësisht kërkesave të përsëritura të "BBC"-së, UEFA nuk dha asnjë shpjegim për këtë vonesë në marrjen e masës disiplinore. Gjyqtari Muro vdiq si pasojë e një aksidenti automobilistik në vitin 1987, kur ishte 45 vjeç, por stadiumi i Anderlehtit edhe sot mban emrin e ish-presidentit, Konstant Vanden Shtok, i cili është ndarë gjithashtu nga jeta në vitin 2008. Elst dhe Van Aken u burgosën të dy. Elst vdiq në burg, ndërsa dënimi i Van Akenit për shantazh u kthye nga Apeli. Dëshmitë - Por, për lojtarët, ngjarjet e 25 prillit 1984 mbeten më të dhimbshme se kurrë. Portieri i Forestit, Hans Van Breukelen, thotë: "Për mua, është tulla e parë që u vendos në korruptimin e arbitrimit. Në të gjithë topat që ishin të diskutueshëm 5050 pranë 18-shes, ai i binte bilbilit dhe jepte goditje dënimi në favor të Anderlehtit". Më pas, Anderlehtit ju akordua edhe një penallti për një ndërhyrje të Keni Sueinit të Notingemit. Sulmuesi Geri Bërtles kujton: "Ajo penallti ishe vendimi më i turpshëm që unë kam parë ndonjëherë në futboll. Distanca mes Keni Sueinit dhe lojtarit të tyre që u rrëzua, ishte absolutisht qesharake". Një gol në fund i Forestit, i cili do të kishte mjaftuar për kualifikimin, u anulua në mënyrë të diskutueshme. Anderlehti fitoi 3-0 dhe u kualifikua. "Ishte gabim atëherë, është gabim sot dhe do vazhdojë të jetë gabim. Nëse këta njerëz nuk dënohen, atëherë ata do të mendojnë se mund ta bëjnë përsëri", thotë Bërtles. Por Hart, i cili shënoi golin e anuluar, tha: "E gjitha kjo mban erë ende sot. Kur e kujtojmë, na torturon akoma".