“Ëndrra” me spiunë, klubi presion lojtarëve

Nëse ka rrjedhje informacioni apo do të flasin pa leje, lojtarët do të gjobiten

Drejtuesit e klubit Vllaznia kanë vënë rregulla të forta për lojtarët e ekipit. Ata kanë kërkuar që lojtarët e skuadrës të jenë larg presionit dhe deklaratave. Për të mos pasur rrjedhje të informacioneve të tjera, drejtuesit e klubit kanë vendosur masa të rrepta për çdo lojtar. Një gjë të tillë mësohet se drejtuesit ua kanë deklaruar vetë lojtarëve. Çdo njëri prej tyre mësohet se do të gjobitet me gjysmën e rrogës nëse do të merret vesh se ata kanë dhënë informacion të brendshëm për mediat. Ndërsa të gjithë lojtarët që do të flasin për mediat pa marrë më parë leje në klub, do të penalizohen me një rrogë të plotë mujore. Këto masa duket se janë kërkuar nga vetë drejtuesit teknik të ekipit, të cilët synojnë që futbollistët të jenë larg deklaratave dhe të fokusohen te takimet e radhës. Me sa duket, as rezultatet pozitive që ka koleksionuar ekipi i Vllaznisë në katër takimet e para nuk krijon qetësi te shkodranët. Stafi teknik pas ndeshje së fundit ka qenë kritik me deklarimet e bëra nga ana e disa lojtarëve. Stafi ka kërkuar që t'i mbajnë larg euforisë lojtarët, pasi e ka cilësuar si një nga pikat më të dobëta të kuqebluve, gjë e cila doli në pah në takimin e fundit me Korabin. Me sa duket në Shkodër kanë nisur të shikojnë ëndrra me spiunë, kështu që për herë të parë për këtë sezon, drejtuesit kërkojnë t'u mbyllin gojën lojtarëve. Në sezonet e shkuara, një gjë e tillë ka qenë e shpeshtë, pasi ishte mungesa e rezultateve që sillte heshtjen për mediat.

Përgatitjet - Vllaznia dje ka nisur përgatitjet për Skënderbeun. Pas pushimit njëditor që erdhi pas ndeshjes me Korabin, kuqeblutë i janë kthyer punës për takimin me të rëndësishëm të këtyre javëve, pasi do të përballen me kampionët në fuqi. Një takim i vështirë për kuqeblutë, pasi do të luhet edhe në transfertë. Për këtë ndeshje, trajneri Cungu nuk do të ketë të gatshëm mesfushorin Florind Bardulla, pasi ka plotësuar numrin tre të kartonëve të verdhë. Sytë mbeten edhe nga infermieria, ku kërkohet rikuperimi i mbrojtësit Antonio Marku, i cili për arsye dëmtimi mungoi ndaj Korabit.