Maloku: Kam idhull Zanetin, Memushaj është lider edhe jashtë fushe
“Manaj, djalë fantastik, ëndërroj Kombëtaren e madhe”
Leonardo Maloku është emri më i ri ndër talentet shqiptarë në Europë. 19vjeçari nga Vora po ngjit me shpejtësi shkallët e karrierës teksa së fundmi ka nënshkruar edhe kontratën e parë si profesionist me ekipin italian të Peskarës, që luan në Serinë A. Në një rrëfim ekskluziv për "Panorama Sport", ai rrëfen për aventurën si futbollist në vendin fqinj.
Origjina - "Kam lindur në Shqipëri, jam nga Vora, ndërsa në moshën 4-vjeçare jam transferuar në Itali së bashku me familjen. Kam filluar të hedh hapat si futbollist në moshën 9-vjeçare në qytetin ku jetoja në Pinero, aty kam vazhduar për rreth 4 vite. Në moshën 13vjeçare u regjistrova në akademinë e futbollit 'Peskara'".
Kontrata si profesionist - "Do të thotë shumë për mua. Është shpërblimi për gjithë këto vite pune dhe përkushtimi dhe këtë e kam arritur edhe falë mbështetjes së madhe që më ka dhënë familja, pa të cilët do ta kisha mjaft të vështirë të jem këtu".
Ekipi i parë - "Stërvitjet me ekipin e parë vazhdojnë normalisht për mua. Aty kam mundësi përmirësimi më të shumta, pasi për një mbrojtës të djathtë si unë, të përballesh me lojtarë si Simone Pepe në atë krah mëson çdo ditë më shumë. Ndërsa për sa i përket debutimit, unë shpresoj të ndodhë sa më shpejt, por është trajneri ai që vendos".
Raportet me trajnerin - "I kam të shkëlqyera. Ai është një njeri dhe trajner i madh. Më ka mbështetur shumë dhe ka besim tek unë. Nuk duhet të harroj që ishte Odo ai që më integroi nga moshat tek ekipi i të rinjve. Shpresoj t'ia shpërblej me punë, besimin që po më jep.
Memushaj dhe Manaj - "Memushaj është kapiteni dhe lideri i kësaj skuadre si në fushën e lojës edhe jashtë saj. Është një lojtar fantastik. Me Manajn kam shumë miqësi. Është djalë punëtor dhe i përkushtuar ndaj futbollit. Shpresoj të na ndihmojë me sa më shumë gola këtë vit, pasi duam të jemi edhe edicionin tjetër në Serinë A.
Kombëtarja U-19 - "Më 29 shtator do jem në grumbullim me U-19 në Shqipëri. Shpresoj të bëjmë më të mirën në këtë edicion edhe pse do përballemi me ekipe prestigjioze. Kam besim te grupi i lojtarëve".
Idhulli - "Havier Zaneti! Është modeli i futbollistit që ndjek dhe dua t'i ngjaj. Për mua ai është ndër më të mëdhenjtë e futbollit botëror".
Ëndrra - "Ëndrra ime më e madhe është të bëhem një futbollist i madh dhe një ditë të luaj për Interin dhe të bëhem pjesë e historisë së tij. Gjithashtu dua që të provoj edhe emocionet që të jep fanella e Kombëtares kuqezi. Shpresoj që një ditë të jem pjesë e saj", përfundon Maloku për "Panorama Sport". Armando Subashi