Ranieri: Mbrëmje magjike, Porton e mundim me Slimanin

Leiçesteri do dëgjojë për herë të parë himnin e Ligës së Kampioneve në shtëpinë e vet. Një moment historik që, për trajnerin Klaudio Ranieri, do të shijohet në maksimum. "Në takimin e parë, me qindra tifozë erdhën në Bryzh për të ndjekur nga afër ekipin dhe për të provuar emocionet e këtij kompeticioni. Por, këtë herë do të jetë më ndryshe, pasi janë emocione më të forta. I gjithë stadiumi ka për të qenë në një festë të paharrueshme dhe ne do ia shpërbejmë me rezultatin e ndeshjes", deklaroi italiani. Ai vlerëson forcën e kundërshtarit, por parashikon edhe lojtarin që do arrijë të bëjë diferencën. "Do jemi kundër një ekipi me shumë eksperiencë, me lojtarë shumë cilësorë dhe që e ka fituar në të shkuarën këtë kompeticion. Gjithsesi, ne jemi kampionët e Anglisë dhe do ta tregojmë statusin që mbajmë. Gjithashtu, në sulm do të luajmë me Slimanin, i cili u ka shënuar shumë herë portugezëve të Portos, gjatë kohës që luante me Sportingun. Besoj se do t'i ndëshkojë sërish dhe do jetë frymëzuesi i fitores sonë", shtoi Klaudio Ranieri. Totenhemi - Mbrëmjen e sotme do të jetë një tjetër anglez në program për të luajtur dhe bëhet fjalë për rivalët e vjetshëm për titull të Leiçesterit. "Në grup janë pikët ato që kanë rëndësi dhe duhet të tregohemi efikas para portës. Nuk mund të shpërdorosh raste të shumta për shënim. Rusët kanë një përgatitje të lartë fizike dhe do mundohen ta shfrytëzojnë këtë element. Nuk e nisëm si duhet, pasi humbëm në takimin e parë, ndaj duhet të rikuperojmë. Fitorja është e vetmja alternativë për ne", tha trajneri Poketino në konferencën për shtyp.