Kros mbron trajnerin: Nuk ka të pazëvendësueshëm
Toni Kros ka folur për çështjen "Ronaldo-Zidan", duke mbajtur anën e trajnerit. Mesfushori ka theksuar se të gjithë duhet të pranojnë vendimet që merren, pasi janë në ekip për të dhënë maksimumin kur u kërkohet. "Një sezon është shumë i gjatë dhe me kalendar të ngjeshur. Luajmë gati 60 ndeshje dhe normale që do të ketë futbollistë që do ulen në stol, apo që nuk do luajnë 90 minuta. Nuk ka asnjë lojtar që të jetë i pazëvendësueshëm. Nuk dua të komentoj rastin e Ronaldos, pasi s'mendoj se duhet të ketë diçka shqetësuese. Ne jemi në klub për të dhënë maksimumin kur na kërkohet dhe për këtë paguhemi. Të gjithë jemi profesionistë", deklaroi mesfushori gjerman, i cili do të rikthehet të luajë kundër Borusias së Dortmundit.