"Në Madrid do vuajmë, bëj 'tris' dhe e mbyll në Mynih"

Ksabi Alonso e ka fituar dy herë Champions-in. Një herë e fitoi me Liverpulin në 2005-ën dhe, për herë të dytë, me Realin në 2014-ën. Gjatë një interviste për gazetën spanjolle "Marca", mesfushori i Bajernit i ka vënë qëllim vetes të bëjë "tris". Ai flet për lojtarët e preferuar, planet për të ardhmen dhe Atletiko Madridin. "Ka për të qenë ndeshje e vështirë. Të dyja skuadrat e njohin mirë njëra-tjetrën. Ne kemi një llogari të hapur, por ishin ata që shkuan në finale dhe jo ne. Atletiko shndërrohet në Champions. Plus, ata bëhen njësh me trajnerin dhe fansat e tyre në "Visente Kalderon". Ne duhet të jemi të kujdesshëm dhe të tundim themelet e tyre. Nëse Atletiko të shënon një apo dy gola, pothuajse nuk ke asnjë shans t'i përmbysësh", nënvizoi Alonso duke shtuar për planet,- "Nuk kam marrë asnjë vendim, por nuk mendoj se do ndryshoj skuadër edhe një herë", sqaroi 34-vjeçari duke nënkuptuar mbylljen e karrierës me Bajernin. Për sa u përket kolegëve të tij të preferuar, veç emrave të mëdhenj si Xherrard, Bekham, Iniesta, Ksavi, Alonso, ka përmendur Kostën dhe Nojerin nga Bajerni.