Duel special, Taulanti i bën “presion” Granitit

“Një ditë dua të luajmë së bashku, e kisha ëndërr Arsenalin”

Për Taulantin, përball ja me Granitin do të jetë një moment special. Mesfushori i Bazelit këmbëngul se vëllazëria e tyre do të harrohet për 90 minuta, ashtu siç ndodhi në verë në Europian. "Kisha pak frikë të luaja kundër tij, sepse nuk doja ta dëmtoja. Por, pasi ndeshja filloi, u qetësova dhe u përqendrova vetëm tek ajo. Të luaj kundër Arsenalit është një ëndërr e fëmijërisë. Do të jetë speciale. Të dy do të hyjmë në fushë me mendime të njëjta, që është të fitojmë dhe japim gjithçka", tha Taulanti gjatë një interviste për britaniken "Telegraph". Pavarësisht se ata e konsiderojnë veten edhe shokë të ngushtë (kanë vetëm një vit diferencë nga njëri-tjetri, Taulanti është 25, ndërsa Graniti 24, madje dje e festoi datëlindjen), Taulanti shton se flet çdo ditë me të vëllanë, por ata janë profesionistë dhe asnjëri nuk do spiunojë te tjetri sekretet e skuadrave respektive: "Nuk do t'i tregojmë njëri-tjetrit se si do të luajnë skuadrat. Ne jemi profesionistë. Unë shpresoj që pas ndeshjes të takohemi shkurtimisht. Por më duhet t'i marr më parë leje trajnerit, kështu që shpresojmë që ai të jetë me humor të mirë". Mesfushori i Kombëtares shqiptare ka edhe një ëndërr: "Që një ditë të luajmë së bashku në të njëjtën skuadër". Por ëndërr fëmijërie për Taulantin ka qenë edhe që një ditë të luajë përballë Arsenalit. Ai e shpreh gjithnjë haptazi krenarinë e tij për arritjet sportive të të vëllait, i cili nga Bazeli u katapultua në Bundesligë, te Gladbahu dhe Bundesliga shërbeu si trampolinë për t'u transferuar më pas në Premier Ligë. Por, nga ana tjetër, ai këmbëngul të theksojë se edhe ai është një lojtar i madh dhe i konfirmuar në nivelet më të larta dhe nuk ndihet aspak inferior në krahasim me të vëllanë: "Nuk mendoj se jam në hijen e Granitit. Mendoj se e kam treguar, përmes paraqitjeve të mia për Bazelin në Champions, se jam një futbollist i mirë".