Presidenti Duka viziton Kamzën, një “asist” për Superioren
Kreu i FSHF-së ka inspektuar dje stadiumin e kamzalinjve
Vizita e djeshme e presidentit të FSHF-së, Armando Duka, në stadiumin e Kamzës ku takoi edhe drejtuesit më të lartë të klubit, u mor si një projektim për skuadrën që pritet të ngjitet në Superiore. Të gjithë e mbajnë mend, kur në sezonin e shkuar presidenti Duka dhe trajneri i Kombëtares, Xhani De Biazi, panë nga afër një ndeshje të Korabit në Kategorinë e Parë, vizitë e cila u mor si një mesazh për ngjitjen e dibranëve në elitë. Presidenti Duka ka vizituar ambientet e stadiumit të Kamzës së bashku me drejtuesit e klubit, kryebashkiakun Mziu dhe presidentin Qarri. Mësohet se shkaku i zbarkimit të kreut të FSHF-së në Kamzë ka të bëjë në lidhjen e një bashkëpunimi me drejtuesit kamzalinj për ndërhyrjen në tapetin e fushës së stadiumit. Kamza e sezonit të ri e ka nisur punën me një objektiv të qartë: ngjitjen në Superiore. Për të arritur këtë qëllim, Bashka e Kamzës dhe presidenti Qarri kanë bërë të mundur që të afrojnë disa lojtarë cilësorë dhe me eksperiencë. Puna e bërë gjatë merkatos së verës dhe ndërhyrja në infrastrukturë pritet që të plotësojnë kushtet që kamzalinjtë të rikthehen në Superiore. Kupa - Kamza e trajnerit Bledar Devolli e ka nisur mbarë kampionatin, pasi në javën e parë kanë fituar 1- 0 në transfertë ndaj Shënkollit. Sot kamzalinjtë presin Korabin për Kupë, veprimtari e cila vlerësohet nga blutë. Të besuarit e trajneri Devolli po përgatiten që të mbyllin një javë të ngjeshur dhe të suksesshme, ku si fillim sot kërkoj fitoren në Kupë ndaj Korabit, ndërsa të shtunën duan trepikëshin ndaj Besës, një tjetër takim që do ta luajnë në shtëpi. Në ndeshjen e sotme, trajneri Devolli pritet të aktivizojë lojtarë që nuk luajtën, ndaj Shënkollit, ndonëse si synim mbetet kalimi i këtij turi. Abdulla Dushku