Ahmataj tregon Bylisin e tij: Ja ndryshimet në skuadër

Bylis e ka nisur më së miri këtë sezon pasi ka mundur në fushën e tij një nga skuadrat më të forta në grup, Pogradecin. Në një prononcim për "Panorama Sport", trajneri Julian Ahmataj shprehet: "Më duhet të pranoj se grupi ku militojmë ka mjaft skuadra të forta dhe pretendente dhe do të jetë i vështirë. Qëllimi ynë është që të shpalosim anët më të mira dhe nga ana tjetër të arrijmë objektivin që i kemi vënë vetes për t'u rikthyer në Superiore", tha trajneri që pranon se brenda ekipit të tij ka edhe probleme. "Mesfusha ende nuk është stabilizuar si duhet pasi ka një ndryshim të filozofisë së lojës nga çfarë ishin mësuar. Kjo ka ardhur pasi disa lojtarë janë afruar vetëm në çastet e fundit dhe duhet koha e duhur që ata të përshtaten si duhet me pjesën tjetër të grupit. Megjithatë, kjo nuk do të na pengojë që Bylisi të jetë një skuadër e suksesshme në çdo ndeshje. Për sa i përket ndeshjes së Kupës, që do të luajmë të mërkurën ndaj Shkumbinit, ne do ta vlerësojmë sepse kemi ambiciet dhe synimet tona, ndaj do ta respektojmë kundërshtarin. Gjithashtu, kjo sfidë do na ndihmojë edhe në drejtim të konsolidimit dhe harmonizimit të mëtejshëm të skuadrës", ka përfunduar trajneriAhmataj. Mikel Mbriçaj