Ballkaniku “2017” i Atletikës në Elbasan
Për herë të parë, stadiumi "Elbasan Arena" do të organizojë Kampionatin për të rinjtë
Elbasani do të jetë organizatori i Kampionatit Ballkanik të Atletikës për të rinj, i cili do të mbahet në qershor të vitit 2017. Federata Ballkanike e Atletikës, Federata Shqiptare e Atletikës dhe Bashkia e Elbasanit kanë nënshkruar në Tel Aviv të Izraelit kontratën, e cila përcakton edhe kushtet për zhvillimin e këtij kampionati. Bashkia e Elbasanit ka shprehur interes për organizimin e këtij aktiviteti mjaft të rëndësishëm, i cili për herë të parë zhvillohet në këtë qytet. Kjo është parë si një mundësi mjaft e mirë për lobimin e qytetit, tashmë që stadiumi "Elbasan Arena" plotëson të gjitha kushtet teknike për aktivitete ndërkombëtare edhe në fushën e atletikës. Pista me tartan e inauguruar pak kohë më parë, përveç aktiviteteve vendase, pret të përurohet edhe nga aktivitete ndërkombëtare, duke shpresuar që atletët vendas të marrin sa më shumë medalje në shtëpinë e tyre. Më herët Kryetari i Bashkisë, Qazim Sejdini, qe shprehur se Elbasani nuk do të jetë vetëm shtëpia e futbollit, por edhe e atletikës dhe organizimi i këtij aktiviteti është vetëm fillimi. Në kontratën e nënshkruar nga nën/kryetari i Bashkisë së Elbasanit, Klevis Xhoxhi, kjo bashki në bashkëpunim me FSHA-në janë shprehur të gatshme të organizojnë këtë event sportiv në respekt të plotë me rregullat e përcaktuara nga Federata Ndërkombëtare e Atletikës. Në këtë aktivitet, Shqipëria do të mbështetet sërish tek atletja më premtuese, Relaksa Dauti. Sportistja që stërvitet nga trajneri Taulant Stermasi nuk merr për të parën herë në një kampionat ballkanik, teksa kujtojmë se ka shkëlqyer në vitin 2015 kur ky aktivitet u zhvillua në Serbi, duke rrëmbyer medaljen e argjendtë. Por, përveç medaljes, atletja ka thyer edhe rekord kombëtar në 800 metra për moshat nën 16 vjeç. Rekordi mbahej nga Eva Licolli me kohën 2'15"90 të regjistruar në vitin e largët 1976. Vladimir Mema