Myler: Kemi llogari të hapur
Kapiteni Lahm: Kujdes nga Grizman, do kënaqesha edhe me një barazim
Tomas Myler ndriçon çdo ditë imazhin dhe mentalitetin bavarez. Ai është ndër të vetmit lojtarë të Bajernit që flet për një hakmarrje. Sulmuesi i Bajernit të Mynihut nuk e harron momentin e ndëshkimit të Grizmanit dhe humbjen e penalltisë së tij. Duke iu referuar atmosferës, ecurisë dhe kualitetit të ekipit, Myler parashikon fitore. "Të gjithë profesionistët që merren me sport e kanë mësuar stilin e Bajernit dhe Atletikos. Tashmë dihet që spanjollët pësojnë shumë pak gola dhe janë mjaft eficientë në aksionet dhe kundërsulmet e tyre. Simeone ka lojtarë individualë të talentuar dhe tek ata mbizotëron forca e grupit", analizoi Myler kundërshtarin e tij duke kujtuar 3 majin e këtij viti në Mynih:
"Natyrisht e dimë se çfarë ndodhi para afro 6 muajsh. Kemi një llogari të hapur me ta. Ndryshe nga dueli i fundit, skuadra është në superformë dhe e plotësuar. Të gjithë janë gati si nga ana fizike dhe psikologjike. Për fat të mirë, këtë sezon njohim vetëm fitore dhe me këtë rezultat planifikoj të dal edhe nga 'Visente Kalderon'. Atmosfera në këtë stadium do jetë mjaft e zjarrtë, por kjo na motivon më shumë për të qenë me këmbë në tokë". Hera e fundit që Bajerni ka dalë me fitore nga Spanja, ndodhi në sezonin e tripletës kur mundi 0-3 Barcelonën në "Kamp Nou".
Lahm, për fitore - Kapiteni Filip Lahm, ndryshe nga Myler, shpreh hakmarrjen në mënyrë të moderuar. "Ne do hyjmë në fushë për ta fituar takimin. Nuk bëhet fjalë për
hakmarrje, pasi ndryshon situata. Atletiko është nënkampione e Europës dhe duhet të kujdesemi për kundërsulmet e Grizmanit. Personalisht do isha i kënaqur edhe me një pikë", nënvizoi Lahm gjatë konferencës për shtyp.