Dortmundi Dortmundi “zverdh” “zverdh” Realin, Realin, Juventusi Juventusi shkëlqen shkëlqen në Kroaci Kroaci

Pjaniç feston dhe frymëzon Higuainin, Dibala del nga tuneli, ndërsa Alvesh mbylli sfidën

Juventusi është gjallë, madje jep shenja se tani e në vazhdim do të jetë edhe më agresiv, pasi në Zagreb thyen shifrat e bllokuara te zero në turneun kontinental dhe dhuron spektakël përballë Dinamos, e cila dorëzohet ndaj yjeve të Masimiliano Alegrit. Trajneri i Juventusit merr përgjigjet e duhura nga ekipi, të cilit i kishte kërkuar qartazi përpara ndeshjes më pak mendjemadhësi dhe më shumë konkretizim. Përfundimi, 4-0 për "Zonjën e Vjetër" dhe ndoshta rezultati mund të kishte qenë edhe më i thellë. Protagonistët e ndeshjes? Të gjithë ata për të cilët u shpenzua dhe u shpresua se do të jenë boshti për të tentuar suksesin kontinental. Pjaniç zhbllokon sfidën, Higuain gjen golin e parë në transfertë, zhbllokohet Dibala, ndërsa Alvesh konfirmon se ndoshta është lojtari më në formë i këtij Juventusi.

Pjaniç, frikë dhe gol - Ndeshja nis me një pikëpyetje të madhe në lidhje me mungesën e talentit dhe lojtarit më në formë që ka Dinamo, Ante Çoriç, i cili nuk figuronte as në pankinë. Thashethemet në Zagreb nënvizonin se pas lojtarit fshihet Juventusi, i cili kërkon ta bëjë të vetin që në janar. Gjithsesi, bardhezinjtë që Alegri kishte hedhur në fushë nuk interesoheshin shumë për këtë argument, por menjëherë lëshohen në sulm sepse janë të bindur që mund ta bëjnë fitoren të tyren. Kampionët e Italisë marrin menjëherë në dorë lojën dhe tentojnë dy herë portën brenda 15-minutëshit, me dy goditje të Higuainit dhe Alveshit, ndërsa Pjaniç goditet shumë ashpër, duke përhapur panikun e një dëmtimi të rëndë, po boshnjaku jo vetëm ngrihet në këmbë, por edhe zhbllokon sfidën në të 23tën. Bonuçi lëshon një pasim të gjatë në hyrje të zonës, por Shildenfeld nuk arrin që të godasë saktë fluturimthi dhe topi shndërrohet në një asist në zonë për mesfushorin bardhezi, i cili me majën e këpucës dhe portierin Semper, shumë larg portës tund rrjetën. Kaq mjafton dhe ndeshja shndërrohet në një dishezë për torinezët, të cilët dyfishojnë tetë minuta më vonë; Pjaniç gjen me një krosim milimetrik në zonë Higuainin, që pasi stopon me trup godet me lehtësi dhe çon shifrat në 2-0. Dhe të mendosh se pak minuta më parë, Dinamo i kishte shkuar shumë pranë barazimit, kur Shildenfeld mund të kishte korrigjuar gabimin, por traversa e ndali.

Më në fund Dibala... - Në pjesën e dytë Alegri vendos të mos e rrezikojë Pjaniçin, por Dinamo e detyruar të sulmojë lë shumë hapësira që Dibala i shfrytëzon më së miri; merr top në qendër të mesfushës kroate dhe nga gati 30 metra lëshon një të majtë të pakapshme. 3-0 për Juven, argjentinasi zhbllokohet dhe ndeshja mund të përfundojë këtu, por jo për Daniel Alveshin, i cili rrumbullakos shifrat në 4- 0 pesë minuta nga fundi, kur gjen me fat devijimin e murit mbrojtës, pas një goditje dënimi, i cili nxjerr jashtë loje portierin e Dinamos. Kaq mjafton që Juventusi të kthehet në shtëpi me një atmosferë feste.