Skandali i përgjimeve, shkarkohet Allardajs
Trajneri i Anglisë këshilloi “biznesmenin” si t'u shmangej rregullave të “FA”-së
Këshilla si t'u shpëtosh rregullave angleze që ndalojnë pronësitë e palëve të treta që prej vitit 2008 dhe disponueshmëria për t'u bërë pjesë e një marrëveshjeje 400 mijë sterlinëshe, tarifa të fiksuara për paraqitje të herëpashershme në Azi, ironi ndaj paraardhësit Roi Hoxhson, kritika për projektin "Wembley" të federatës, deri në opinione përçmuese ndaj Princit Uilliam dhe vëllait të tij Herri, të cilin e përkufizoi si "shumë të keq": dukej me të vërtetë e pamundur që Sem Allardajs, trajneri i Anglisë, t'i mbijetonte goditjes së "Daily Telegraph"- it që përmes një gazetari të infiltruar si biznesmen, nxori zbuluar menaxherin e kombëtares, i cili edhe më parë ka qenë i përfshirë në punë të errëta.
Shkarkim apo dorëheqje - Allardajs, trajneri më i paguar i kombëtareve në botë, me një rrogë vjetore prej 3 milionë sterlinash, u mor dje në pyetje nga federata gjatë gjithë ditës në "Wembley" për të bërë depozitimin e dëshmisë së tij për "FA"në. Skenari më i mundshëm është që ai të shkarkohej ose për ta zbutur disi skandalin, të dorëhiqet. Ndodhi kjo e dyta. Trajneri i U-21, Garet Sauthgejt, do të marrë drejtimin e skuadrës për sfidën me Maltën e programuar për t'u zhvilluar në "Wembley", më 8 tetor, në pritje për të zbuluar se cili do ta marrë postin e Allardajsit. "Big Sam", ashtu siç e quajnë në ishull gazetarët, disa prej të cilëve e cilësuan të drejtë zgjedhjen për t'ia besuar atij kombëtaren pavarësisht jetëshkrimit modest (ka drejtuar Limerikun, Blekpullin, Nots Kauntin, Boltonin, Njukasëllin, Blekbërnin, Uest Hemin dhe Sandërlendin) dhe jo një trajneri të huaj, ra në të njëjtin kurth ku ngeci në vitin 2006 edhe ish-trajneri i "Tre Luanëve", Zven Goran Erikson. Në atë rast, "The Sun" tregoi shpirtin e babëzitur të suedezit, por këtë herë kuadri është më i zymtë. Allardajs, frazat e të cilit janë filmuar dhe regjistruar (materiali prej ditës së djeshme është në dispozicion të "FA"-së), nuk shfaqi asnjë dilemë për të këshilluar strategjitë e bërjes bisht të rregullave, por edhe në përfshirjen e një konflikti të mundshëm interesi.