Revoltohet Fili, gati largimi nga Partizani
E konfirmon menaxheri i lojtarit: Nëse s'luan, në janar shohim mundësi të tjera
Partizani barazoi në derbi, ku ruajti pathyeshmërinë në 10 duelet e fundit me bardheblutë, por diferenca me Skënderbeun e vendit të parë ka shkuar në 4 pikë. Përpos këtij fakti, në kampin e kuq jo çdo gjë shkon në harmoni të plotë, pasi disa...
Partizani barazoi në derbi, ku ruajti pa thyeshmërinë në 10 duelet e fundit me bardheblutë, por diferenca me Skënderbeun e vendit të parë ka shkuar në 4 pikë. Përpos këtij fakti, në kampin e kuq jo çdo gjë shkon në harmoni të plotë, pasi disa lojtarë nuk po "përtypin" lënien në stol. Një nga të pakënaqurit për mosaktivizim është edhe Relado Fili, i cili gjendjen emocionale e tregoi që pas derbit kur shpërtheu në lot në pankinë. Fili nuk u preferua titullar në këtë takim, por edhe pse u bë gati të luante si zëvendësues, trajneri Sormani nuk e aktivizoi asnjë minutë. 20-vjeçari bëri një paraqitje të mirë në Kupat e Europës duke qenë i vetmi lojtar i të kuqve që ka shënuar në Europë. Menaxheri i lojtarit, Elton Marini, në një prononcim për "Panorama Sport" ka pohuar se nuk përjashtohet mundësia që Fili të largohet në janar nga Partizani. "Klienti im është i pakënaqur për hapësirat e pakta që ka pasur në dispozicion kohët e fundit. Është i ri në moshë dhe ka nevojë për më tepër minuta. Pas paraqitjeve pozitive në Europë, ishte i motivuar për të vazhduar me një ritëm të lartë, por kjo mungesë besimi mund të ndikojë negativisht. Si menaxher i tij, po mendoj largimin në merkaton e janarit, në një klub tjetër. Qoftë edhe në formë huazimi. Do ishte në të mirën e lojtarit dhe klubit që një futbollist në moshë të re, pjesë e Kombëtares U-21, të ketë mundësi që të shprehë potencialin që zotëron dhe njëkohësisht të rritet më tepër futbollistikisht", deklaroi Elton Marini, menaxheri i Realdo Filit.