Liga e Kombeve, shans për Shqipërinë dhe Kosovën
Ja si mund ta sigurojnë ekipet kualifikimin për në këtë turne
UEFA ka risjellë në vëmendje një aktivitet të ri, i cili është miratuar në dhjetor të vitit 2014. Komiteti Ekzekutiv i këtij institucioni ka miratuar në atë periudhë një mundësi për vendet europiane që ta fitojnë...
UEFA ka risjellë në vëmendje një aktivitet të ri, i cili është miratuar në dhjetor të vitit 2014. Komiteti Ekzekutiv i këtij institucioni ka miratuar në atë periudhë një mundësi për vendet europiane që ta fitojnë pjesëmarrjen me anë të një kompeticioni paralel me kualifikueset. Të 54 anëtaret e UEFA-s do të shmangin ndeshjet miqësore, por do të jenë pjesë e këtij turneu të vogël që zëvendëson miqësoret. Arsyetimi i UEFA-s është që, gjatë gjithë kohës, anëtarët e saj të zhvillojnë ndeshje zyrtare dhe jo më ndeshje miqësore, e në këtë mënyrë, të ardhurat nga e drejta televizive do të jenë më të mëdha për secilën federatë anëtare të UEFA-s. Ndeshjet - Liga e Kombeve do të luajë ndeshjet e saj nga shtatori deri në nëntor të vitit 2018. Federatat e anëtarësuara në UEFA do të ndahen në katër divizione të ndryshme, në bazë të renditjes së koeficienteve të UEFA-s, të përditësuara pas përfundimit të kualifikueseve europiane për Botërorin 2018. Liga e Kombeve UEFA A dhe B do të përbëhen secila nga 4 grupe me 3 skuadra, Liga e Kombeve UEFA C do të ketë 2 grupe me 3 skuadra dhe 2 grupe me 4 skuadra, ndërsa Liga e Kombeve UEFA D do të ketë 4 grupe me nga 4 skuadra. Katër ekipet fituese të grupeve të Ligës së Kombeve UEFA A do të luajnë ndaj njëra-tjetrës me sistemin e eliminimit direkt në qershorin e vitit 2019, për të përcaktuar se cili do të jetë kampioni i këtij turneu, me gjysmëfinalet që do të caktohen nga shorti, ndërsa vendi i zhvillimit të ndeshjeve do të caktohet nga UEFA. Ndeshjet "play off", për të kualifikuar nga ky aktivitet 4 skuadra në "Euro 2020", do të luhen me sistemin e eliminimit direkt. Nëse fituesit e grupeve do të jenë kualifikuar direkt nëpërmjet kualifikueseve të rregullta të "Euro 2020", skuadra/skuadrat më të mira të radhës brenda së njëjtës ligë do të kualifikohen në "play off" në vend të tyre. Në fund, katër Kombëtare do të përfitojnë pjesëmarrjen në Europian nga ky turne.