Ronaldo: Kurrë nuk bëhem trajner, ka shumë stres
“Mund të fitojmë Champions-in dy herë radhazi, Zidan është teknik i shkëlqyer”
Kristiano Ronaldo mendon se Zinedin Zidan është një trajner i madh dhe, për këtë fakt, Reali i Madridit mund të fitojë Champions-in e dytë radhazi. Portugezi vlerëson sezonin e kaluar si më të bukurin e karrierës, ndërsa nuk është i qartë për të ardhmen e tij. Ai thotë se nuk dëshiron të bëhet trajner, sepse këta të fundit vuajnë shumë, por s'e përjashton si mundësi që diçka e tillë të ndodhë në 10 vitet e ardhshme. Portugezi thotë për "World Soccer" se Europiani me Portugalinë ishte diçka e madhe, por tani kombëtarja në të cilën ai është kapiten do të tentojë të fitojë edhe Botërorin. Sipas Ronaldos, në futboll asgjë nuk është e pamundur.
Sezoni i kaluar - "Vitin e kaluar mendoj se ishte më i miri në karrierën time. U referohem titujve që fitova, edhe pse çdo vit që luaj futboll është i bukur dhe emocionues. Fitova Ligën e Kampionëve me Realin dhe Europianin me Portugalinë. Ishte vit magjik, por dua të vlerësoj edhe Bejlin dhe Grizmanin sepse kanë luajtur shumë mirë".
Europiani - "Ishte hera e parë në histori dhe është gjithmonë speciale kur fiton diçka për herë të parë. Championsin e kisha fituar 3 herë, por duhet të fitoja diçka me Portugalinë. Isha shumë i motivuar dhe mendoja për shokët e mi të skuadrës, për familjet dhe të afërmit e mi në Portugali. Ishte diçka shumë speciale". Trajner - "Mos bëni shaka. Në Europian nuk isha zëvendëstrajner, por e mendoj shumë diçka të tillë. Për momentin nuk dua të bëhem trajner. Njerëzit thonë se jam i duhuri për të bërë diçka të tillë, por unë nuk dua. Është shumë e vështirë. Të jesh trajner vuan shumë dhe unë dua vetëm të përqendrohem te futbolli i luajtur, i cili është pasioni im. Në të ardhmen, askush nuk e di çfarë do të ndodhë dhe, ndoshta për 10 vite, unë mund të ndryshoj mendim mbi trajnerët".
I motivuar - "Të gjithë pyesin se ku e gjej vullnetin dhe dëshirën për të luajtur ende futboll. Unë kam fituar gjithçka, por futbolli është pasioni im dhe unë mund të vazhdoj t'i bëj të lumtur tifozët. Të tjerëve u pëlqen të më shohin dhe unë jap më të mirën për ta, shënoj gola, e ndihmoj skuadrën të fitojë trofe. Vazhdoj të luaj ashtu si disa vite më parë".
Botërori - "Do të punojmë shumë. Fakti që, për herë të parë në histori, arritëm të fitonim Europianin, sigurisht që është e mundur të fitonim edhe Botërorin. Ndihem shumë mirë me shokët e mi dhe kemi tifozë të mrekullueshëm. Duhet të shijojmë momentin që po jetojmë, por kam thënë gjithmonë që në futboll gjithçka është e mundur. Thjesht duhet që t'i shohim gjërat me pozitivitet".
Dy Champions - "Sigurisht që mund t'i fitojmë dy Champions radhazi. Nëse luan në një ekip si Reali, i ke të gjitha shanset dhe mundësitë për ta menduar diçka të tillë. Kemi një ekip të madh dhe një trajner të zotin. Kemi eksperiencën e duhur për të bërë realitet diçka të tillë dhe do të tentojmë me të gjitha mundësitë që kemi. Do të ishte shumë bukur, mbi të gjitha për tifozët tanë".