Kaos në Angli, thellohet skandali i përgjimeve
Ngjarjet e fundit detyruan Sem Allardajsin të tërhiqet
Figuron edhe emri i një menaxheri ital ian në pjesën e dytë të hetimit të zhvilluar nga "Daily Telegraph", e cila hodhi dritë mbi korrupsionin që ekziston në futbollin anglez. Bëhet fjalë për Pino Paljara, 61 vjeç, xhenovez, i cili është skualifikuar në 2005-ën për rastin Xhenoa- Venecia ( valixhja e famshme me 250 mijë euro). Gjatë disa takimeve me biznesmenët nga Lindja e Mesme, të cilët kanë qenë gazetarë të së përditshmes britanike të maskuar si biznesmenë, Paljara ka zbuluar emrat e 8 trajnerëve të tjerë të së tashmes dhe të së kaluarës së afërt të Premier Ligë që kanë marrë ryshfet për shitblerjen e lojtarëve të ndryshëm në merkato. Pesë prej këtyre emrave duket se kanë paguar direkt menaxherin italian, i cili më pas i ka shtuar listës dy trajnerë të tjerë të Championship. Një nga takimet me Paljarën është zhvilluar në restorantin "San Carlo" të Mançesterit, ku takohen zakonisht trajnerë, drejtues dhe gazetarë. "Mendoja se italianët ishin të korruptuar, por këtu në Angli është akoma më keq. Gjithçka fshihet poshtë tavolinës. Si funksionon? Një nga këta trajner, kur ka negociuar për një lojtar
në të kaluarën, më thoshte 'Pino, a ka një kafe edhe për mua?'. - ' Sigurisht që ka, - përgjigjesha'. - Më pas bëheshin negociata për atë kafe. Këtij personi nuk i kemi bërë kurrë pagesa direkte. Një ish-trajner i Premier Ligës më jepte detajet e llogarisë bankare që kishte në Zvicër. Një tjetër, ish-lojtar dhe që tani është trajner kërkon gjithmonë para ekstra,
sepse nuk ka një rrogë shumë të lartë në klubin e tij dhe kënaqet me shuma të vogla". Pjesët e tjera të hetimit të "Telegraph" duhet të zbulojnë emrat e këtyre tetë trajnerëve dhe mund të kushtëzojnë zgjedhjet e Federatës Angleze të Futbollit, që është në kërkim të zëvendësuesit të Sam Allardajs, i cili ka qëndruar në detyrë vetëm 67 ditë. Federata
ia ka besuar përkohësisht kombëtaren trajnerit aktual të Under 21, Garet Suthgejt, por nëse rezultatet do të jenë pozitive mund të vijë edhe konfirmimi si trajner me kohë të plotë. Emrat e tjerë në garë janë: Stiv Brus, Alan Pardjë, Edi Houi dhe uellsiani Kris Koleman, ndërsa alternativat jashtë Britanisë janë Mançini, Blank dhe Van Gal.