Dinamo e pandalshme, bind edhe ndaj Pogradecit
Liqenorët janë larguar me humbje nga kryeqyteti
Dinamo nuk e ka ndalur serinë e rezultateve pozitive edhe në ndeshjet e Kupës së Shqipërisë. Edhe pse me formacionin e dytë, të besuarit e trajnerit Allmuça kanë arritur të fitojnë ndaj Dinamos, duke hedhur një hap drejt kualifikimit në turin tjetër. Sa i takon ndeshjes së djeshme, duhet theksuar se blutë kishin mundësi që të shënonin edhe më shumë, por kanë shpërdoruar. Ndeshja - Takimi nis i vrullshëm dhe Dinamo kërkon golin që në minutën e 4-t, ku Myslymi kroson nga e djathta, por Ugu nuk është në vendin e duhur. Pogradeci mundohet të reagojë dhe në të 15ën një top i gjatë vjen në brendësi të zonës së Dinamos, por nuk shfrytëzohet nga Yzellari. Minutat kalojnë dhe blutë janë të paqartë para portës së liqenorëve. Megjithatë goli nuk do të vonojë dhe në të 41-ën Hekollari ndal me dorë një top të krosuar në zonë nga Murataj. Ka 11-metërsh dhe kapiteni Traga nuk gabon duke kaluar ekipin e tij në avantazh, ndërsa golin ia dedikon ish-punëtorit të klubit, Kadri Skrelës që ka humbur jetën pak kohë më parë. Fraksioni i dytë i ndeshjes gjen sërish Dinamon në sulm dhe goli këtë herë nuk do të vonojë, pasi lojtarët janë më të çliruar psikologjikisht. Goditje këndi për Dinamon dhe Traga që kroson saktë duke gjetur Ugun që këtë herë nuk gabon dhe e ndal sferën në rrjetë. Pas këtij momenti, liqenorët "zgjohen" dhe kërkojnë golin e parë dhe e arrijnë atë në minutën e 79-të. Ilir Allmuça ndal në mënyrë të gabuar Bangour në zonë, arbitri akordon penallti, për të cilën nuk janë dakord blutë dhe protestojnë, pasi faulli nuk ekzis- tonte, por kjo nuk ia ndryshon vendimin kryesorit. Bangour gjuan penalltinë, por Caka bën mrekullinë, pret mjaft bukur në të majtë të portës. Topi rikthehet në zonë dhe në gjuajtjen e dytë portieri mik shënon.
Deklarata - Një nga lojtarët më të mirë në sfidën e djeshme, Bazion, pas ndeshjes është shprehur: "Jam i kënaqur për fitoren. Duhet të kishim bërë më shumë, por ky është futbolli. Kemi mundësi të mbrojmë rezultatin, madje të fitojmë edhe atje. Golin ia dedikoj ish-pjesëtarit të stafit tonë, Kadri Skrelës, ndaj festova me fizioterapistin tonë, djalin e të ndjerit". Skerdilaid Sulozeqi