Shqipëria kandidon për Botërorin e 2019-ës
FSHP-ja kërkon të organizojë kampionatin e të rinjve në Tiranë
Shqipëria ka hedhur zyrtarisht kandidaturën për të organizuar Kampionatin Botëror për të rinj në peshëngritje që do të mbahet në vitin 2019. Lajmi është bërë i ditur dje për "Panorama Sport" nga sekretari i FSHP-së, Agron Haxhihyseni. FSHP-ja ka dërguar një shkresë zyrtare, teksa ka bërë me dije ndërkombëtarët se kërkon të organizojë në Tiranë këtë event madhor. Kandidaturat do të shpallen në vitin 2017 dhe midis vendeve konkurruese në këtë garë është edhe i yni. Ky vendim erdhi pas larjes së gjobës që ndërkombëtarët i kishin vënë Shqipërisë pas skandalit të dopingut, i cili tronditi këtë sport. Falë marrëdhënies së shkëlqyer që gëzon presidenti i FSHP-së, Elez Gjoza, me ndërkombëtarët, mësohet se Shqipëria ka shanse të mira për të organizuar këtë kampionat në vendin tonë. Kujtojmë se në vitin 2013 në pallatin e sportit "Asllan Rusi" u organizua kampionati europian i peshëngritjes për të rritur, një nga aktivitetet më të mëdha që është organizuar në vendin tonë. Ky aktivitet u prit shumë mirë nga ndërkombëtarët, të cilët dhanë vlerësimet maksimale për Europianin e moshave. Asokohe, presidenti aktual, Gjoza, e analizoi me këto fjalë organizimin e një aktiviteti të tillë: "Ky kampionat u refuzua nga 2 shtete relativisht më të mëdha sesa Shqipëria, siç janë Spanja dhe Bullgaria, për shkak të krizës ekonomike. Si pasojë, Kampionati Europian iu propozua Shqipërisë, ku federata jonë e ka pranuar me kënaqësi këtë aktivitet, duke pasur parasysh mbështetjen që ky kampionat ka nga Ministria e Turizmit, Kulturës, Rinisë dhe Sporteve". Sipas tij, peshëngritja në Shqipëri ka qenë dhe mbetet sporti më cilësor në vendin tonë, ku vlen të përmendim sportistë të mëdhenj, si: Ymer Pampuri kampion olimpik, si dhe Aleksandër Kondo. Kjo traditë ka vazhduar dhe në brezat e ardhshëm, pasi vetëm në 10-vjeçarin e fundit në aktivitetet ndërkombëtare janë marrë më shumë se 190 medalje, ku Shqipëria, për nga numri i medaljeve, renditet ndër vendet e para në botë ku vazhdimisht janë shfaqur talente.