Barcelona fiton edhe pa Mesin, përmbys Gladbahun
Spanjollët fitojnë dhe marrin kreun e grupit
Të gjithë ata që kishin mprehur lapsin për të shkruar se Barcelona ka limitet e saj pa Lionel Mesin në fushë, janë zhgënjyer thellë, sepse pavarësisht faktit që në Gjermani e panë veten në disavantazh për 65 minuta, katalanasve iu deshën më pak se 10 për të përmbysur, pasi fillimisht barazuan me Arda Turanin, gjithmonë e më shumë deciziv në këtë skuadër në ndeshjet e fundit. Kundër Borusia Mynshengladbahut përfundoi 2- 1 për spanjollët dhe kaq mjaftoi që ata të marrin kryesimin solitar të grupit, në pritje të duelit direkt me Mançester Sitin.
Barça në gjumë - Pa "Pleshtin", trajneri Luis Enrike zgjodhi Pako Alkaserin, por me një numër 9 "të vërtetë" në fushë, duket se Barcelona nuk e tremb shumë Gladbahun, madje shpeshherë bën disa kombinime të gabuara, të cilat ulin dozën e rrezikshmërisë së skuadrës. Pastaj, nëse Nejmari që duhet të marrë "rolin" e argjentinasit mendon që të shtrihet në fushë për gati një orë, çdo herë që preket nga kundërshtarët, atëherë është shumë e thjeshtë për të zotët e shtëpisë që të kontrollojnë ndeshjen. Madje, ata arrijnë që të kalojnë në avantazh që në pjesën e parë; në minutën e 34t, Buskets humb një top në mesfushë dhe Mahmud Dahud nuk mendohet dy herë, por nis kundërsulmin e Mynshengladbahut, i cili e priste këtë rast të artë, me Torgan Hazard që nuk mund të gabojë përpara portës. Barcelona, e cila e kishte marrë shumë lehtë ndeshjen deri në atë moment, dhe kishte gabuar në mënyrë flagrante avantazhin ( Suarez u tregua më tepër altruist seç duhej dhe në vend që të godiste pasoi për Nejmarin, që u parapri nga mbrojtësi) nis të kuptojë se kundërshtari po bëhej gjithmonë e më i rrezikshëm me kalimin e minutave. Prandaj, trajneri Enrike diti të marrë masat në pushim të ndeshjes duke hedhur në fushë Arda Turanin, lojtarin që ndryshoi rrjedhshmërinë e lojës së Barcelonës, por edhe rezultatin e takimit. Mesfushori turk nuk vonoi që të barazonte shpejt shifrat; në të 64-ën Nejmar shpik një asistparabol në zonë për Turan që nga pak centimetra larg portës godet me forcë dhe shkund rrjetën. Kaq mjafton që Barcelona të bëhet më agresive dhe Mynshengladbahu të trembet, gjë jo e mirë kjo për gjermanët që kapitullojnë nëntë minuta më vonë, kur Pike shtyn në rrjetë, brenda zonës së vogël një goditje të Suarezit që nuk ishte larguar nga portieri Somer. Për Borusian shpresat për pikë shuhen aty, por të paktën futbollistët meritojnë duartrokitjet e tifozëve, të cilët mbetën të kënaqur me rezistencën që u bënë katalanasve.