Iliria mund Flamurtarin, Magani: Lojtarët jashtë orbitës
Revoltohet trajneri: Vetëm Kuqi e Shehaj më bindën
Iliria bën surprizën e madhe në Kupën e Shqipërisë, duke fituar ndaj Flamurtarit me shifrat 10. Një gol i 17- vjeçarit nga Fushë-Kruja, Kiri Zira, ka vendosur ndeshjen, e cila ka pasur dy tablo loje. Në 45 minutat e para vlonjatët kanë dominuar totalisht, duke shpërdoruar plot gjashtë raste për shënim. Ndërsa në pjesën e dytë Iliria ka luajtur si e barabartë me Flamurtarin, duke e ndëshkuar këtë të fundit në minutën e 88të. Zira goditi bukur në hyrje të zonës, duke mposhtur portierin Stivi Frashëri. Disa prej titullarëve të kuqezinjve ishin lënë pushim, por kjo nuk e justifikon paraqitjen e dobët të vlonjatëve në Fushë-Krujë. Sulmuesi Idrizaj është bërë protagonist i rasteve të humbura. Trajnerët Magani dhe Ziri bënë nga tri ndryshime në pjesën e dytë. Loja e fushë-krujasve ishte më bindëse, teksa u dallua Lama, por pa harruar Zunën dhe Zirën, që i dhanë një tjetër impuls Ilirisë. Në minutën e 56-të është portieri Baku që i mohon një gol të sigurt Idrizajt, për të ardhur te goli i avantazhit, ku një meritë të madhe ka Bardhi, i cili pas inkursionit nga e majtë krosoi në zonë dhe aty 17vjeçari Zira me një goditje të bukur mposhti Frashërin.
Trajneri - Gugash Magani ka shpërthyer pas ndeshjes së djeshme. Trajneri i Flamurtarit, duke folur për "Panorama Sport", ka kritikuar ashpër lojtarët. "80% e skuadrës dukej sikur ishte pushim. Përveç Kuqit dhe Shehajt, që më bindën, të gjithë të tjerët ishin jashtë orbite. Jam shumë i pakënaqur, edhe pse në fushë nuk kishim lojtarë si Halili, Berisha, Bushiç, Fazliu, Zeqiri dhe Lukiç. Testova pjesën tjetër të ekipit, por jam i pakënaqur me atë që ata dhanë në fushën e lojës, pasi nuk shprehën asgjë. Këta lojtarë, të cilët u aktivizuan në Kupë, jo vetëm më kanë zhgënjyer, por nuk do të jenë më as në orbitën time, siç kanë qenë deri tani. Nuk më bindën aspak dhe mund të përfundojnë në tribunë", paralajmëroi trajneri peqinas. Ndërkohë, përtej humbjes, ai nuk e diskuton kualifikimin. "Javën tjetër do të jemi me 100% të ekipit dhe do ta kalojmë me sukses këtë tur", përfundoi trajneri Magani.