Tirana do hakmarrje në fushën e Lushnjës
Gjirokastritët Propozuam të luanim në kryeqytet, s pranuan
Tirana ka pësuar humbjen e parë se zonale pas nëntë ndeshjesh. Kur kishin 159 ditë pa u mundur dhe më shumë se 810 minuta pa pësuar disfatë, bardheblutë janë thyer përballë Luftëtarit. Një nga arsyet për këtë ishte edhe terreni jo i mirë për të zhvilluar një ndeshje të Kategorisë Superiore. Kryeqytetasit do të kërkojnë hakmarrjen përballë Luftëtarit, por në një tjetër terren të keq. Takimi i vlefshëm për Kupën e Shqipërisë do të zhvillohet në stadiumin e Lushnjës, të mërkurën, në orën 14:00.
Terreni - Fillimisht, drejtuesit e skuadrës së Luftëtarit kanë propozuar stadiumin e Sarandës për të zhvilluar ndeshjen e radhës në Kupën e Shqipërisë përballë bardhebluve. Gazeta "Panorama Sport" ka mësuar se drejtuesit e skuadrës kryeqytetase e kanë kontestuar, duke qenë se ai stadium nuk është i licencuar për ndeshjet e Kategorisë Superiore. Ndërsa drejtuesit e skuadrës 24 herë kampione kanë pretenduar me të drejtë një stadium me kushte të mira të terrenit, organizatorët e takimit i kanë propozuar FSHF-së stadiumin e Lushnjës, "Roza Haxhiu". Mirëpo, fakt është që me reshjet e shumta të shiut në javët e fundit, edhe fusha e këtij stadiumi nuk pritet që të jetë në kushtet maksimale.
Gjirokastritët - Pas deklaratave të trajnerit Daja se Luftëtari nuk kishte ruajtur të njëjtin standard veprimi me Tiranën si me skuadrat e tjera rivale për kreun e klasifikimit, ka ardhur një reagim nga njëri prej përfaqësuesve të stafit të skuadrës gjirokastrite.
Gentjan Nora, shefi i klubit gjirokastrit, i ftuar në emisionin sportiv "Fair Play" në "News 24", ka shpjeguar edhe komunikimin mes dy klubeve përpara ndeshjes. "Edhe Tiranës i propozuam të njëjtën gjë si skuadrave të tjera. I kërkuam që të gjente një stadium
për të zhvilluar ndeshjen, qoftë edhe 'Elbasan Arena'- n, por që takimi të regjistronte Tiranën si pritëse dhe në ndeshjen e fazës së dytë të ishte Luftëtari pritës dhe të luhej në Gjirokastër. Ata nuk pranuan", ka deklaruar Nora.