Mbjellja e fushës pritet të mbyllë “Selman Stërmasi”-n për këtë javë
Partizani-Skënderbeu, me shumë mundësi të dielën në Elbasan
Partizani ka kërkuar nga drejtuesit e stadiumit "Selman Stërmasi" dhe klubi "Tirana" që ndeshjen e kësaj jave me Skënderbeun ta luajë në impiantin e vetëm të kryeqytetit. Duke qenë klub i kryeqytetit dhe që tifozët më të shumtë ndodhen në Tiranë, të kuqtë kanë dashur që të mos i provojë dashamirësit e tyre për të parë kryendeshjen e javës së 9-të. Sipas kalendarit të përcaktuar për këtë javë, Partizani-Skënderbeu është vendosur të luhet të hënën e 31 tetorit në orën 18:00, ndërsa përballja Tirana-Vllaznia do të luhet të shtunën në orën 17:00. Duke ditur dëshirën e klubit të kuq për të pritur korçarët në kryeqytet, oraret e përcaktuara lanë të kuptosh se të dy takimet e klubeve kryeqytetase do të luheshin në "Selman Stërmasi". Por gjasat janë që asnjëra prej këtyre dy takimeve të mos luhen në këtë impiant. Shkak për këtë bëhet mbjellja me bar e fushës së stadiumit. Ky proces ka nisur pas përfundimit të ndeshjes që "demat" luajtën me Korabin. Në këto kushte Partizani është i detyruar që ta presë Skënderbeun në "Elbasan Arena", por Drejtori i Përgjithshëm i të kuqve, Genc Tomori, pohoi për "Panorama Sport" se klubi do të kërkojë që takimi të zhvendoset për të dielën. Gjithsesi ende nuk ka
përgjigje përfundimtare nga administruesit e stadiumit "Selman Stërmasi". "Ne e kemi bërë kërkesën tonë për të luajtur ndeshjen me Skënderbeun në stadiumin e vetëm të kryeqytetit. Duke ditur rëndësinë e ndeshjes dhe dëshirën e madhe të tifozëve tanë për të qenë sa më
pranë ekipit, menduam që të luajmë në kryeqytet, pasi distanca me Elbasanin i privon shumë tifozët për të qenë të pranishëm. Ende nuk kemi marrë përgjigje përfundimtare, pasi pretekst mbetet mbjellja me bar e fushës. Sipas këtij procesi, i bie që edhe Tirana të mos luajë këtë
fundjavë në stadium. Nëse do të luajmë në Elbasan, ne do të kërkojmë që ndeshja të zhvendoset të dielën, pasi si ditë pushimi do të ketë më shumë mundësi për praninë e tifozëve në 'Elbasan Arena'. Besoj që sot situata do të jetë më e qartë", u shpreh Tomori.